Кыһыҥҥы таҥас-сап сыаната төһө буолла?

Истээх таҥаһы-сабы төһө сыанаҕа кэтэн кыһыммытын туоруурбутун билээри, атыы-эргиэн кииннэрин, ырыынактары кэрийэн, ону тэҥэ интэриниэт, инстаграм маҕаһыыннарга өҥөйтөөн, тэҥнээн көрдүбүт.

«Столичнай» ырыынак «сиэрдээх» сыаналара

Боростуой пуховик – 7000-10000 тыһ. солк. тиийэр. Биллэр бренд репликалара – 7500-8000 солк. Туһанааччылар ортолоругар киэҥ биһирэбилинэн туһанар “Баск”, “Канада Гус” кууркаларын сыаната – 6000-9000 тыһ. солк. Оҕо “Баск” пуховига – 6500-7000 тыһ. солк.

Истээх ыстаан сыаната 2000-3000 солкуобайтан саҕаланар.

Сылаас бэрчээкки 400-500 солк. турар. Оттон сахалыы оһуордаах кыһыҥҥы үтүлүк сыаната 1500-2500 солк., түүлээхтэрэ – 3000 тыһыынчаҕа тэҥнэһэр. Кыһыҥҥы бачыыҥкалар ортотунан 4500-6000 солк. тураллар.

Instagram-маҕаһыыннар тос курдуктар

Кэнники бириэмэҕэ таҥаһы Instagram-маҕаһыыннартан атыылаһар буоллубут. Балайда табыгастаах эрээри, 2-3 нэдиэлэҕэ диэри кэтэһиннэриилээх сакааһынан үлэлииллэр.

Кыһыҥҥы пуховик 15000-16000 солк. тэҥнэһэр. Frompoles диэн бренд куурката – 12000-13000 солк. тиийбит. Хаачыстыбаннай тигиилээх пуховик куурка – 13000-18000 тыһ. тиийэр.

Фирма маҕаһыыннар...

Пуховиктар фирменнэй маҕаһыыннарга 40-45 тыһ. солк. тураллар, сорох маҕаһыыҥҥа 70-90 тыһыынчаҕа тиийэллэр. Фасонуттан, матырыйаалыттан,  оҥорон таһаарбыт фирматыттан сыаната хамсыы турар эбит. Кыһыҥҥы бачыыҥка сыаната 17000-20000 тыһ. солк. тэҥнэһэр.

Этэрбэс сыаната

Этэрбэс сыаната быйыл 45 000 тыһ. солк. тиийбит. Киһи син кэтиэх курдук, орто хаачыстыбалаах атаҕын таҥаһын сыаната 35-37 тыһ. солк. саҕаланар эбит. Ол эрээри маҕаһыын аайы сыана араас. Кыһыммыт чугаһаан, сорох маҕаһыыннар чэпчэтэллэр, сорохтор, төттөрүтүн, ыараталлар. Ол курдук, былырыыҥҥы коллекцияттан унтуулар 20 тыһыынча солкуобайга атыыланаллар.

Инньэ гынан, боростуой киһи кыһыны туоруур таҥаһыгар кырата 100-чэкэ тыһ. солк. наада. Оттон кытай ырыынагын табаара төһө даҕаны биллиилээх фирмаларга үүт-маас майгыннаатар, ис моһуона, оҥоһуута, хаачыстыбата сыанатыгар эппиэттээбэтэ кистэл буолбатах.