«Куттала суох муус» аахсыйа үһүс түһүмэҕэ ыытыллар
Өрөспүүбүлүкэ ууларын эбийиэктэригэр «Куттала суох муус» биэдэмистибэлэр икки ардыларынааҕы аахсыйа үһүс түһүмэҕэ тохсунньу 24-30 күннэригэр ыытыллар.
Аахсыйа кэмигэр СӨ ЫБММ салаалара олохтоох бэйэни салайыныы уорганнарын бэрэстэбиитэллэрин, баһаарынай-быыһыыр, уопсастыбаннай тэриллиилэри, сонуннары киэҥник тарҕатар сириэстибэлэри уонна быраабы араҥаччылыыр уорганнары кытта нэһилиэнньэ ортотугар мууска сэрэхтээх буолуу быраабылаларынан сэрэтэр үлэни күүһүрдэллэр.
Сүрүн сыал – уу эбийиэктэригэр быһылааны таһаарбат буолуу, быраабылалары кэһиини булуу уонна ити хайысханан сэрэтэр үлэни ыытыы. Биэдэмистибэлэр икки ардыларынааҕы патруллуур уонна сэрэтэр бөлөхтөр «Мууска куттала суох быһыы» тиэмэнэн биирдиилээн бэсиэдэлэри, лекциялары, онлайн-тэрээһиннэри ыыталлар.
Улахан болҕомтону исписэлиистэр мууһу туоруур сирдэргэ уураллар. Мууска тырааныспарынан киирэр хаһан баҕарар, оннооҕор томороон тымныыга сэрэхтээҕэ бэлиэтэнэр. Итиннэ анаан оҥоһуллубут эрэ сирдэринэн туоруур ирдэнэр. Ону тутуспат дьону тутан административнай боротокуоллар толоруллаллар.
Итини сэргэ улахан болҕомтоҕо оҕолор сылдьаллар. Инспектордар кинилэри кытта мууска сэрэхтээх буолуу быраабылаларын, уу эбийиэктэригэр быһылаан тахсар төрүөттэрин, сэрэхтээх буолуу туһунан сэрэтэр бэсиэдэлэри ыыталлар.
Үөрэх тэрилтэлэригэр сэрэтэр бөлөхтөр оҕолорго бөҕө муус хайдах көрүҥнээх буоларын, мууһунан сөпкө хайдах хаамыллыахтааҕын өйдөтөллөр, ЫБММ сотрудниктара муус анныгар түспүт киһиэхэ көмөнү оҥорору уонна бэйэҥ түстэххинэ хайдах буолары көрдөрөллөр.
Өрөспүүбүлүкэ дьоҕус суудуналарга судаарыстыбаннай инспекцията санатар: уу эбийиэктэрин туоруур сирдэргэ информационнай бэлиэлэри булгуччу тутуһуҥ, бэйэҕитин уонна дьоҥҥутун харыстааҥ.
Сонуннар
Ордук ааҕаллар
