Куоскаҕын, ыккын регистрациялаатыҥ дуо?

Куорат баһылыга Сардана Авксентьева дьаһалынан 2020 сыл алтынньы 19 күнүттэн сэтинньи 20 күнүгэр диэри куорат уокуругун сиригэр-уотугар дьиэ кыылларын регистрациялааһын биллэриллибитэ.

Ол курдук, бу кэмҥэ 224 ыт уонна 45 куоска регистрацияланна. Сэтинньи 17 күнүнээҕи туругунан, чуолаан Гагаринскай, Автодорожнай, Сайсары, Строительнай уокуруктарыгар, Кангалаас уонна Марха микрооройуоннарыгар, Пригороднайга, Тулагыга уонна Хатаска ордук элбэх  кыыл хабылынна.

Маны таһынан уокурук уонна куорат таһынааҕы нэһилиэктэр үлэһиттэрэ бэйэлэрин сирдэригэр-уоттарыгар сыһыарыллыбыт учаастактары рейдэлииллэр, профилактическай бэсиэдэ ыыталлар, дьиэ кыылларын тутууга аналлаах быраабылалары түҥэтэллэр. Дьокуускай куорат Административнай хамыыһыйата иһитиннэрбитинэн, алтынньы 19 күнүттэн сэтинньи 13 күнүгэр диэри 55 рейдэ ыытылынна, ол түмүгэр 16 боротокуол толорулунна.

Өскөтүн  дьон кыылларын регистрациялыыртан куотунар түбэлтэлэригэр, кинилэргэ административнай кэһии туһунан боротокуол толоруллар. Ыстараап кээмэйэ: гражданнарга – 1000-1500 солк.; дуоһунастаах дьоҥҥо – 3000-4000 солк.; юридическай сирэйдэргэ – 5000-10 000 солк.

Дьокуускай куоракка дьиэ кыылларын тутууга бигэргэммит Быраабыланан хаһаайыттар ыттарын, куоскаларын булгуччу регистрациялыахтаахтар. Дьиэ кыылларын учуокка туруоруу СӨ Дьокуускай куорат ветеринарияҕа управлениетыгар оҥоһуллар.

Күндү куорат олохтоохторо! Ыккытын, куоскаҕытын регистрациялыы илик буоллаххытына, кытаатыҥ, тиэтэйиҥ. Мантан аллара судаарыстыбаннай бэтэринээринэй сулууспа аадырыстарын таһаарабыт:

1. Дьокуускай куорат, Чехов уул., 66, төл. 35-32-78

2. Mapxa бөһүөлэгэ, Сэбиэскэй уул., 38, төл. 204-627

3. Хатас сэлиэнньэтэ, Ойуунускай уул., 4/1, төл. 409-003

4. Тулагы сэл., Совхознай уул., 2/1, төл. 207-277

6. Маҕан бөһ., Антеннай уул., 1/3.

Бу ыйыллыбыт бэтэринээрнэй сулууспаларга регистрацияны ааһаҕыт, пааспар ылаҕыт, бэйэ баҕатынан чип туруортарыаххытын сөп, бары быһыылары туруораллар.