Куораты киртитээччилэри ыстарааптыыр кыах баар

Ол курдук, куорат сиригэр-уотугар көҥүлэ суох миэстэҕэ бөҕү тоҕуу, сүөкээһин, быраҕыы, сокуону кэһэн туран учаастак үрдэтии түгэннэрин Дьокуускайдааҕы айылҕа харыстабылын кэмитиэтигэр үҥсүөххэ сөп. 
Холобура, суол кытыытыгар, аппаҕа, уу кытылыгар, чааһынай учаастактарга массыынаттан бөҕү сүөкүү турар түгэннэрин бэлиэтии көрдөххүтүнэ, хаартыскаҕа түһэрэн, видеоҕа устан, быһыы-майгы буолбут аадырыһын, күнүн-дьылын, тиэхиньикэ нүөмэрин ыйан туран,  yak_kop@sakha.gov.ru электроннай почтаҕа эбэтэр аадырыска аҕалан биэриэххэ сөп: Дьокуускай к., 202-с түөлбэ, 18/2 куорпус.
Санатар буоллахха, биирдиилээн дьоҥҥо таһаҕас тиэйэр массыынаттан бөҕү быраҕыы иһин ыстараап кээмэйэ 40 тыһ. солкуобайтан саҕаланар, тиэхиньикэн бас билэр тэрилтэлэргэ - 100 тыһ. солкуобайтан. Буруйу оҥорууну хатылааһын иһин ыстараап ыйыллыбыт кээмэйтэн үрдүгүн ааһан, бөҕү көҥүлэ суох сиргэ сүөкээбит массыына конфискацияланыан сөп.
Итини таһынан сокуону кэһээччи буруйунан буомурбут сир иэниттэн көрөн мөлүйүөнүнэн суумалаах накаастабыл баарын умнар сатаммат. Ол туһунан айылҕа харыстабылын кэмитиэтигэр иһитиннэрэллэр.