Куораты киртитээччилэри ыстарааптыыллар

Ыстатыйа муниципальнай тэриллии сиригэр-уотугар үлэлиир тупсаҕайдык олоруу быраабылаларын кэһиигэ сыһыаннаах. Тиһиктээх үлэ түмүгүнэн 69 сэрэтии уонна 1 419 000 солк. кээмэйдээх ыстараап олохтонно.

«Буруйу оҥоруу баһыйар өттө олорор дьиэлэр тиэргэннэрин кирдээхтик тутууга сыһыаннаах. Ол курдук, Салайар хампаанньалар, сири бас билээччилэр даҕаны өттүлэриттэн олорор дьиэлэр тиэргэннэрин бөҕүн-сыыһын ыраастаабат, кэмигэр тиэйтэрбэт түбэлтэлэрэ элбэх», - диэн бэлиэтиир Дьокуускай куорат Административнай хамыыһыйатын бэрэссэдээтэлэ Феликс Антонов.

Ордук элбэх боротокуол Центральнай уокурукка оҥоһуллубут – 24, ол кэнниттэн Сайсары – 22, Автодорожнай уокурук – 20.

«Бу хартыына чуолаан ааттаммыт уокуруктар ордук кирдээхтэр, территорияларын хомумматтар диэн буолбатах, төттөрүтүн, бу уокуруктарга хонтуруол күүстээҕин, нэһилиэнньэни эппиэтискэ тардыыга тиһиктээх үлэ ыытылларын көрдөрөр. Атыттарга хонтуруол үлэтэ мөлтөх», - диэн ситэрэн биэрэр Феликс Антонов. Бэлиэтээн эттэххэ, СӨ Административнай буруйу оҥоруу иһин кодексатын 6.25 ыстатыйатынан боротокуоллары толорор боломуочуйа территориальнай управлениеларга сүктэриллэр.

Оттон олорор территорияны сыыһырдыы, ыраастаабат буолуу иһин ыстараап көрүллэр. Чуолаан:

— гражданнарга – 1 000 солкуобайтан 3 000 солкуобайга диэри, буруйу оҥоруу хатыланар түбэлтэтигэр – 3 000  солкуобайтан 5 000 солкуобайга диэри;

— дуоһунастаах сирэйгэ – 10 000 солкуобайтан 30 000 солкуобайга диэри, буруйу оҥоруу хатыланар түбэлтэтигэр – 30 000 солкуобайтан 50 000 солкуобайга диэри;

— юридическай сирэйгэ – 50 000 солкуобайтан 500 000 солкуобайга диэри, хатыланар түбэлтэтигэр 500 000 солкуобайтан 1 000 000 солкуобайга диэри.