Куорат уокуругар Бүтүн Арассыыйатааҕы нэһилиэнньэ биэриэпиһигэр бэлэмнэнии салҕанар
Киин куоракка 2021 сыл алтынньы 15 күнүттэн сэтинньи 14 күнүгэр диэри ыытыллыахтаах Бүтүн Арассыыйатааҕы нэһилиэнньэ биэриэпиһигэр бэлэмнэнии көхтөөхтүк ыытыллар. Хас биирдии уокурукка уонна куорат таһынааҕы нэһилиэнньэлээх пууннарга биэрэпис учаастактара оҥоһулуннулар, биэрэписчиктэр ахсааннара чуолкайданар, аадырыстаах хаһаайыстыба сааһыланар.
Ол курдук, Хатас сэлиэнньэтигэр 2 биэрэпис учаастага бэлэмнэммит, уопуттаах 12 биэрэписчик үлэлиирэ былааннаммыт. Хатас сэлиэнньэтин территориятыгар 14 элбэх кыбартыыралаах, 1558 чааһынай уонна 30 блок тутуулаах дьиэлэр бааллар. 2010 сыллаах биэрэпис дааннайдарынан манна 5 028 олороро биллибит. Биэрэпис чэрчитинэн аадырыстар чуолкайданаллар, нэһилиэнньэни сырдатыы социальнай ситимнэр нөҥүө ыытыллар.
Маҥан сэлиэнньэтигэр 1 биэрэпис учаастага, 4 уопуттаах биэрэписчик үлэлиэхтэрэ. Манна 1 934 киһи олорор, кинилэргэ биэрэпис туһунан информацияны социальнай ситимнэр нөҥүө тиэрдэллэр, дьаһалта аадырыстардаах аншлагтары туруортарар.
Бүтүн Арассыыйатааҕы нэһилиэнньэ биэриэпиһин сонуннарын кытта Уокуруктааҕы дьаһалта сайтыгар yakutskcity.ru билсиэххитин сөп.
Бүтүн Арассыыйатааҕы нэһилиэнньэ биэриэпиһэ-2020 быйылгы сылга көһөрүллэн алтынньы 15 күнүттэн сэтинньи 14 күнүгэр диэри ыытыллар. Гражданнар биэрэпиһи дьиэлэригэр, биэрэписчиги кэтэһэн, эбэтэр биэрэпис учаастактарыгар ааһыахтарын сөп.
Итини сэргэ биэрэпиһи бэйэлэрэ Судаарыстыбаннай өҥөлөр порталларыгар 2021 сыл алтынньы 15 күнүттэн сэтинньи 14 күнүгэр диэри онлайн толоруохтарын сөп.
Бүтүн Арассыыйатааҕы биэрэпис барыллаан түмүгэ 2022 сыл муус устар ыйыгар тахсыаҕа. Бүтэһиктээх түмүк 2022 сыл IV кыбаарталыгар тахсар. Ол туһунан strana2020.ru сайтка этиллэр.
Сонуннар
Ордук ааҕаллар
