Куорат санитарнай туругун дьүүллэстилэр

Үбүлүөй тэрээһиннэрин чэрчитинэн Саха Өрөспүүбүлүкэтин бырабыыталыстыбатын бэрэссэдээтэлин бастакы солбуйааччы Дмитрий Садовников бэрэссэдээтэллээх олохтоох дьаһалта уонна өрөспүүбүлүкэ ситэриилээх былааһын уорганнарын кыттыгас мунньахтара ыытылынна. 
Мунньахха киин куорат санитарнай туругун, суол уонна оскуолалар өрөмүөннэрин уонна да атын тыын суолталаах боппуруостары дьүүллэстилэр.  «Өрөспүүбүлүкэтээҕи структуралар Дьокуускай куорат дьаһалтатын кытта бииргэ үлэлииллэригэр регион салалтатын кэккэ сорудахтара бааллар. Быһаарыллыахтаах боппуруос элбэх, ол иһигэр куорат уокуругун санитарнай туруга», — диир Дмитрий Садовников. Кини бэлиэтээбитинэн, мунньах үбүлүөйдээх тэрээһиннэр чэрчилэринэн ыытылынна. «Бу олохтоох дьаһалта көҕүлээһининэн ыытыллыбыт оробуочай көрсүһүү Куорат күнүн уонна Саха АССР 100 сылын бэлиэтиир үбүлүөйдээх тэрээһиннэри үрдүк таһымнаахтык ыытар сыалтан тэрилиннэ. Холобур, «Куттала суох уонна хаачыстыбалаах суоллар» национальнай бырайыак, оскуолалар өрөмүөннэрин, тутуу балаһааккаларын тула элбэх ыйытык мунньулунна», — диэтэ бырабыыталыстыба бэрэссэдээтэлин бастакы солбуйааччы.