Куорат салалтата хочуолунайдары кэрийдэ
Дьокуускай куорат баһылыгын эбээһинэһин толорооччу Евгений Григорьев «Пригородная теплосетевая компания» тэрилтэ хочуолунайдарыгар сырытта, Киллэм, Капитоновка уонна Тулагы санитарнай туруктарын бэрэбиэркэлээтэ.
Евгений Григорьев Киллэм хочуолунайын көрөн-истэн баран, саҥа модульнай хочуолунай тутуллара наадатын бэлиэтээтэ.
«Бу хочуолунай былааннаммыт өрөмүөнэ суох сүүрбэччэ сыл үлэлии турар. Уларыттахпытына, 3 элбэх кыбартыыралаах дьиэҕэ итии уу систиэмэтин чөлүгэр түһэриэхпит этэ», – диэтэ.
«Пригородная теплосетевая компания» тэрилтэ дириэктэрэ Сергей Андриевскай Капитоновка хочуолунайыгар икки эргэ хочуолу уларытаары, саҥаны атыыласпыттарын кэпсээтэ. Ол 24 эбийиэги, В.И. Кононов аатынан Капитоновкатааҕы кырдьаҕастар уонна инбэлииттэр интэринээт-дьиэлэрин итии уунан хааччыйар эбит. Саҥа хочуоллары кулун тутар ыйга туруорар былааннаахтар.
Тулагы хочуолунайа 2001 сылтан олорор дьиэлэрин, ону таһынан оскуола, балыыһа, спортивнай оскуола курдук социальнай эбийиэктэри итии уунан хааччыйар. Евгений Григорьев манна өрөмүөн үлэтин ыытыахха наада диэтэ.
Элбэх кыбартыыралаах дьиэ олохтоохторо «Туймаада-сервис» салайар хампаанньаны үгүстүк үҥсэллэр.
«Салайар хампаанньаны олохтоохтор бэйэлэрэ талан аныыллар. Салгыы бу хампаанньа үлэлиирин-суоҕун эбэтэр атыҥҥа уларытар – кинилэр бырааптара. Олохтоох дьаһалта онно дьайар бырааба суох. Ол эрээри, салайар хампаанньаларын уларытар түгэннэригэр, биһиэхэ сүбэлэттэриэхтэрин сөп», – диэтэ Евгений Григорьев.
Санатар буоллахха, салайар хампаанньалар үлэлэрин СӨ Тутууну уонна дьиэни-уоту кэтээн көрүү судаарыстыбаннай управлениета хонтуруоллуур.
Сонуннар
Ордук ааҕаллар
