Куорат сөтүөлүүр сирэ үлэтин саҕалаата
Бэс ыйын 17 күнүнээҕи туругунан Саха сиригэр үс, ол иһигэр Дьокуускай куорат 202-с түөлбэтигэр оҥоһуллубут сөтүөлүүр сир аһылынна.
«Бүгүҥҥү күҥҥэ өрөспүүбүлүкэ үрдүнэн үс пляж официальнайдык арылынна: Дьокуускай куорат 202-с түөлбэтигэр, Бүлүү куоратын Оруктаах күөлүгэр баар пляжтар уонна Мэҥэ Хаҥалас «Хотун Мааччыйа» сынньалаҥ баазата»,- диэн иһитиннэрэр ЫБММ ГИМС киинин начаалынньыгын солбуйааччы Иван Попов.
Салгыы бэс ыйын 20 күнүттэн Дьокуускайга Бүлүүлүүр суол 16 км баар Сугун күөлгэ, бэс ыйын 28 күнүттэн Чурапчы улууһун Бэс Болугур нэһилиэгэр Амма өрүскэ, оттон от ыйын 1 күнүттэн Аллараа Бэстээххэ Абаҕа Күөлгэ уонна Чурапчы улууһугар Адаамка Аппата сиргэ Амма өрүскэ сөтүөлүүр көҥүллэниэҕэ.
Ити курдук 2024 сылга өрөспүүбүлүкэҕэ уопсайа нэһилиэнньэ маассабайдык сөтүөлүүрүгэр 7 миэстэ оҥоһуллар.
Статистика көрдөрөрүнэн, ууга алдьархай тахсыыта сөтүө кэмигэр сэрэҕэ суох буолууттан, сөтүөлүүргэ анамматах сирдэргэ сынньанартан, арыгылааһынтан, оҕо аймах төрөппүт хонтуруола суох сылдьыытыттан тахсар.
Санатар буоллахха, көҥүлэ суох сирдэргэ сөтүөлээһин куттал суох буолуутун мэктиэлээбэт. Алдьархай тахсар түгэнигэр «101» эбэтэр «112» төлөпүөннэринэн эрийэргитин умнумаҥ, диэн СӨ ЫБММ пресс-сулууспата иһитиннэрэр.
Сонуннар
Ордук ааҕаллар
