Куорат олохтоохторун Бүтүн Арассыыйатааҕы сүүрүүгэ ыҥыраллар

Сүүрүү балаҕан ыйын 16 күнүгэр «Юность» стадионтан саҕаланыаҕа.

Олохтоох дьаһалта Физическэй култуураҕа уонна спортка управлениетын информациятынан, Бүтүн Арассыыйатааҕы сүүрүү кыттыылаахтарын регистрацията  09:00 чаастан 11:30 чааска диэри ыытыллар. Тэрээһин үөрүүлээх аһыллыыта 11:30 чааска буолар, кросс 12:10 саҕаланар.

Күрэхтэһиигэ ким баҕалаах, Арассыыйа гражданина кыттар кыахтаах. Хас биирдиилэригэр нүөмэр бэриллэр.

Кыттааччылары сааһынан көрөн бөлөхтөргө араараллар:

- кыргыттар уонна уолаттар (2011 сыллааҕы төрүөхтэр уонна онтон кыралар) – 1 км эбэтэр 2 км (тэрийээччилэр быһаарыыларынан);

- кыргыттар уонна уолаттар (2009-2010 сыллааҕы төрүөхтэр), кыргыттар уонна уолаттар (2006-2008 сыллааҕы төрүөхтэр), дьахталлар уонна эр дьон (2005 сыллааҕы төрүөхтэр уонна онтон аҕа саастаахтар) – 2 км.

Салайааччылар ортолоругар туспа сүүрүү ыытыллар, дистанцията – 2 км.

1-кы, 2-с уонна 3-с миэстэҕэ тиксибит кыттааччылар мэтээллэринэн уонна грамоталарынан наҕараадаланыахтара.