Куорат олохтоохторо федеральнай бырайыакка кытыннылар

От ыйын 8 күнүгэр, Дьиэ кэргэн, таптал уонна бэриниилээх буолуу күнүгэр, Дьокуускай куоракка «Гостеприимный город для всех» федеральнай социальнай бырайыак ыытылынна.

Бырайыак куорат инфраструктурата нэһилиэнньэ бары араҥатыгар табыгастаах буоларын ситиһэр туһуттан уопсастыбаннас, бизнес болҕомтотун инклюзивнай маршруттары тэрийиигэ тардар сыаллаах ыытыллар.
Ол курдук, бырайыак кыттыылаахтара үс маршруту бэрэбиэркэлээтилэр. 
Бастакы бөлөх Хомсомул болуоссатыттан Култуура уонна сынньалаҥ пааркатынан сырытта. Бөлөххө «Харысхал» аһымал пуонда иһинэн «Среда» ыччат инклюзивнай киинин уонна Бүтүн Арассыыйатааҕы инбэлиит оҕолоох төрөппүттэр тэрилтэлэрин Саха сиринээҕи салаатын чилиэннэрэ сырыттылар.
Иккис бөлөх «Тыгын Дархан» гостиницаттан Кырдьаҕас куоратынан ЗАГС дьиэтигэр диэри хаамта. 
Бөлөххө Бүтүн Арассыыйатааҕы инбэлииттэр уопсастыбаларын Саха сиринээҕи салаатын чилиэннэрэ сырыттылар. 
Таалай күөл кытылыттан Наталья Водянова балаһааккатыгар диэри үһүс маршрукка Бүтүн Арассыыйатааҕы истибэттэр уопсастыбаларын Саха сиринээҕи салаатын чилиэннэрэ сырыттылар.
Маршруту ааһыы кэмигэр бырайыак кыттыылаахтара Яндекс Карта платформаны туһаннылар уонна бэлиэтээһиннэри оҥордулар. 
«Гостеприимный город для всех» федеральнай бырайыак Арассыыйа бары куораттарыгар ВЭБ.РФ корпорация өйөбүлүнэн Судаарыстыбаннай дуума ыччат политикатыгар кэмитиэтин уонна Стратегическай көҕүлээһиннэр агентстволарын кытта ыытыллар.
Дьокуускай куоракка бырайыагы үлэ уонна социальнай сайдыы министиэристибэтэ Олохтоох дьаһалтаны кытта ыытта, диэн иһитиннэрэр үлэ уонна социальнай сайдыы министиэристибэтин пресс-сулууспата.