Куорат маастар-былаанын оҥорууга бэлэмнэнии саҕаланна

Дьокуускайга куорат маастар-былаанын оҥорорго Бүтүн Арассыыйатааҕы куонкуруска бэлэмнэнии саҕаланна. Куорат баһылыга Евгений Григорьев маастар-былаан үлэтин тэрийээччилэри, Москватааҕы «Центр» стратегическай сайдыы Агентствотын бэрэстэбиитэллэрин кытта мунньахтаата.  Бу туһунан Уокуруктааҕы дьаһалта пресс-сулууспата иһитиннэрдэ. 
Көрсүһүүгэ куораты тутууга уонна тырааныспар инфраструктуратыгар Департамент салайааччыта Северина Архипова, Дьокуускай куорат кылаабынай архитектора Семен Сергеев, СӨ Баһылыгын иһинэн үлэлиир архитектура уонна куораты тутуу Управлениетын,  СӨ «Целевой фонд будущих поколений» НКО бэрэстэбиитэллэрэ кытыннылар. 
Москваттан кэлбит оробуочай бөлөх үс күн устата чинчийиилэри ыытыахтаах, аналитическай матырыйааллары хомуйан сайдыы сүрүн кыаҕын, ону сэргэ куорат кыһалҕалаах учаастактарын быһаарыахтаах. Чинчийиллибит матырыйааллар Бүтүн Арассыыйатааҕы аһаҕас куонкурус кыттыылаахтарыгар маастар-былааны оҥорорго бэриллэллэр. Куонкурус түмүгэр үс киһи тахсыахтаах, онтон кыайыылаах талыллыахтаах. 
Евгений Григорьев өрөспүүбүлүкэ киин куоратын туһунан информацияны иһитиннэрдэ, Саха сирин Ил Дарханын Дьокуускай 2032 сылга диэри сайдыытын туһунан Ыйааҕын тоһоҕолоон бэлиэтээтэ. Куорат баһылыга матырыйаал хомуйарга Дьокуускай территориятын улахан аҥаара сэттис тыастаах зонаҕа (седьмая шумовая подзона) киирэрин болҕомтоҕо ылалларын курдук көрдөстө. «Куорат иһигэр уонна кытыытыгар элбэх учаастак ууга барар зоналарга түбэһэр. Биэрэги көмүскүүр тутуу оҥоһуллар боппуруоһа быһаарыллар», – диэн бэлиэтээбит  Евгений Григорьев.
Итини таһынан, Дьокуускайга элбэх кыбартыыралаах хаарбах туруктаах мас дьиэлэргэ олорор 40-ча тыһыынча киһини көһөрөр боппуруос сытыытык турар. Ити ураты суолталааҕын бэлиэтээн туран, Евгений Григорьев Уокуруктааҕы дьаһалта киинтэн 17-с кыбартаалга көһөр былаанын этии быһыытынан киллэрибитин санатта. 
«Муниципальнай бырагыраама чэрчитинэн 2022 сылга ити кыбаарталга үс мас дьиэ көтүрүллүөҕэ. 7-с тыастаах подзонанан сибээстээн итиннэ олорор дьиэлэри тутуу бобуллар, онон биһиги куорат дьаһалтатын саҥа дьиэтин тутары былаанныыбыт», — диэбит куорат баһылыга.
Куорат киинигэр турар билиҥҥи дьиэтигэр нэһилиэнньэни приемнуур уопсастыбаннай киин оҥоһуллара былааннанар. 
Сэтинньи 17 күнүгэр куорат баһылыга Евгений Григорьев Дьокуускай маастар-былаанын оҥоруу саҕаламмытыгар анаммыт пресс-конференцияҕа спикер быһыытынан кыттыбыт. Тэрээһин онлайн көрүҥүнэн ТАСС Пресс-киинигэр уонна «Сахамедиа» Медиа-кииҥҥэ ыытылынна. Пресс-конференция спикердарынан өрөспүүбүлүкэ Ил Дархана  Айсен Николаев, СӨ Баһылыгын иһинэн үлэлиир архитектура уонна куораты тутуу Управлениетын салайааччыта,  өрөспүүбүлүкэ кылаабынай архитектора Ирина Алексеева буоллулар.