Куорат маастар-былааныгар олохтоохтор санаалара учуоттаныа

2022 сыл кулун тутар 20 күнүгэр диэри маастар-былаан бырайыагын чэрчитинэн куорат кэскилин, олоҕун хаачыстыбатын, тулалыыр эйгэтин, инфраструктурнай уонна социальнай кыһалҕаларын быһаарар олохтоохтор санааларын хомуйуу салҕанар. Ыйытыктар түмүктэрэ Бүтүн Арассыыйатааҕы СӨ киин куоратын маастар-былаанын оҥорор аһаҕас куонкурус техническай сорудаҕын төрүтүнэн буолуохтара. Бу туһунан Олохтоох дьаһалта пресс-сулууспата иһитиннэрдэ.
Бырайыак ситиһиилээх буолара хайаан даҕаны киин куорат олохтоохторо кытталларыттан быһаччы суолталаах. Хас биирдиибит https://opros.masterplan-yakutsk.ru/ сайтка киирэн, анкетаны толорон, итиннэ баар ыйытыктарга хоруйдуохпутун сөп. Ыйытыктар үс салааҕа араарыллыбыттар. 
Маастар-былаан бырайыагын чэрчитинэн, Олохтоох дьаһалта структурнай салаалара куонкурус техническай сорудаҕын бэлэмнииргэ туһааннаах үлэни барытын оҥордулар. 
Куораты тутуу уонна тырааныспар инфраструктуратын Департаменын салайааччы Северина Архипова иһитиннэрбитинэн, олунньу 28 күнүнээҕи туругунан куонкурус техническай сорудаҕын бырайыага Департамент өттүттэн ирдэнэрэ барыта бэлэм.
«Бырайыакка Дьокуускай куорат 85-с, 167-с, 171-с, 92-с, 11-с, 13-с кыбаарталлара, ону тэҥэ Газовиктар, Кирзавод, Марха дьоҕус оройуоннара киирдилэр. Территориялары талыыга мас уонна хаарбах туруктаах олорор пуонданы хабар, куорат инники сайдар кэскилин торумнуур сыаллаахпыт», – диэн бэлиэтиир  Северина Архипова.
Санатар буоллахха, Саха Өрөспүүбүлүкэтин Бырабыыталыстыбатын көҕүлээһининэн, Өрөспүүбүлүкэ Баһылыгын иһинэн үлэлиир архитектура уонна куораты тутуу Управлениета 2021 сыл сэтинньи 17 күнүгэр Дьокуускай куорат маастар былаанын бырайыагын оҥорууну саҕалаабыта. Бырайыак партнердара – «ДОМ.РФ» АУо, Олохтоох дьаһалта, «СӨ үүнэр көлүөнэтин Целевой пуондата» КСУо. Куонкурус оператора – «ЦЕНТР» Агентство.