Куорат кытыытыгар сибээс сайдар

Куорат кытыытынааҕы административнай территорияларга  сибээс волоконнай-оптическай ситимин тутуута салҕанар. Бу туһунан Олохтоох дьаһалта пресс-сулууспата иһитиннэрэр.  
Бэлиэтээн эттэххэ, 2021 сыл ахсынньы 30 күнүгэр Олохтоох дьаһалта уонна «ТрансТелеКом» (ТТК) АУо куорат кытыытынааҕы территориялары сибээс аныгы түргэн ситиминэн хааччыйарга бииргэ үлэлэһэр туһунан сөбүлэҥҥэ илии баттаспыттара. 
Үлэ графигын быһыытынан, 2022 сыл олунньу 1 күнүгэр түргэн интернет волоконнай-оптическай ситиминэн Хатас сэлиэнньэтигэр тиийбитэ. Бэрэбиэркэлиир сыаллаах бастакы холбонуулар тохсунньу 21 күнүгэр оҥоһуллубуттара.
Билиҥҥи кэмҥэ волоконнай-оптическай ситими Үрүҥ Күөлгэ, Хатыҥ Үрэхтээҕи шоссеҕа, Кирзаводка тутуу туһунан бырайыак чопчуланар.  
Куорат кытыытынааҕы административнай территорияларга  сибээс волоконнай-оптическай ситимин тутуу биир сүрүн инфраструктурнай бырайыагынан буолан эрэр. Ити дьон олоҕун табыгастаах, куораты кытта тэҥ кыахтаах оҥорор, куорат уонна кытыы территориялар  социальнай-экономическай сайдыыларыгар төһүү күүһүнэн буолар. 
Санатар буоллахха, сибээс волоконнай-оптическай ситимин тутуу куорат баһылыга Евгений Григорьев быыбар иннинээҕи бырагырааматыгар баара. Бырайыак олоххо киирэригэр Олохтоох дьаһалта күүскэ үлэлэһэр.
Былырыын балаҕан ыйын 1 күнүгэр оптоволоконнай ситим Марха дьоҕус оройуонугар уонна «Сатал» СОНТ киирбитэ. Ахсынньы ыйга волоконнай-оптическай ситимҥэ холбонуу үлэтэ «Айхал» ТСН, Газовиктар бөһүөлэктэригэр, «Чолбон» СОНТ, «Сатал» СОНТ 10-с кыбаарталыгар уонна «Победа-2012» СОНТ түмүктэммитэ. Билигин ити территориялар олохтоохторо ТТК түргэн интернетигэр холбонор кыахтаахтар. Саҥа абоненнарга аналлаах 850 солкуобайтан саҕалаан 30 мбит/с тарифтар бааллар. Итини таһынан, сүрүн тарифтарга элбэх оҕолоох ыалларга чэпчэтии көрүллэр, онтон олунньу 9 күнүттэн интерактивнай телевидение көстүөхтээх.
Билиҥҥи туругунан түргэн интернетинэн уонна интерактивнай телевидениенан кытыы оройуоннарга – Мархаҕа, Саталга, Хатаска 15 тыһыынча кэриҥэ дьиэ кэргэн туһанар. Гражданнар ити ситимнэргэ тэтимнээхтик холбоно олороллор.