Куорат кытыытыгар өрөмүөннэнэр суоллар

2022 сылга, «Куттала суох уонна хаачыстыбалаах суоллар» национальнай бырайыак чэрчитинэн, куорат кытыытыгар 13,6 км уһуннаах 8 уулусса өрөмүөннэниэҕэ диэн иһитиннэрдэ Олохтоох дьаһалта пресс-сулууспата.  
Өрөмүөннэнэр суоллар испииһэктэригэр Пригороднай сэлиэнньэтин Центральнай, Хатас сэлиэнньэтин Ленин уонна Октябрьскай, Киллэм сэлиэнньэтин Уваровскай, Табаҕа сэлиэнньэтин Каландаришвили (2 учаастак), Кангалаас дьоҕус оройуонун Нагорнай, Марха дьоҕус оройуонун Мархинскай уулуссалара, итиэннэ Хатас сэлиэнньэтигэр элбэх оҕолоох ыаллар кыбаарталларыгар тиийэр суол тутуута киирдилэр. 
Түһэрсиллибит хантыраактарга олоҕуран, Киллэм сэлиэнньэтин Уваровскай, Хатас сэлиэнньэтин Ленин уонна Октябрьскай уулуссаларыгар бэдэрээччитинэн «РИК Автодор» АУо буолла. Хас биирдии эбийиэктэрин уһуна – 1 км. 
Кангалаас дьоҕус оройуонун Нагорнай уулуссатын саҥардан оҥорууну «Дорстрой» ХЭТ ыытыаҕа, үлэ кээмэйэ – 0,502 км.
«Альянс-2005» ХЭТ 5 км Хатас сэлиэнньэтигэр элбэх оҕолоох ыаллар кыбаарталларыгар тиийэр суолу тутуоҕа. 
Табаҕа сэлиэнньэтин Каландаришвили (2 учаастак) (1,1 км.), Пригороднай сэлиэнньэтин Центральнай (1,7 км.) уонна Марха дьоҕус оройуонун Мархинскай уулуссаларыгар (2,2 км.) өрөмүөн үлэтин «РИК Автодор» АУо ыытыаҕа.
Үөһэ этиллибит эбийиэктэртэн, бүгүҥҥү күннээҕи туругунан, суол үлэтэ Пригороднай сэлиэнньэтин Центральнай уонна Табаҕа сэлиэнньэтин Каландаришвили уулуссаларыгар бара турар. 
Ол курдук, Пригороднай сэлиэнньэтин Центральнай уулуссатыгар массыына сылдьар суолун аспааллааһына түмүктэннэ. Уулуссаны сырдатыы, суол бэлиэлэрин туруоруу хаалла. Бэдэрээтчит «РИК Автодор» АУо тротуардары оҥорууну саҕалаата. 
Табаҕа сэлиэнньэтин Каландаришвили уулуссатыгар сир балаһатын кэҥэтии, суол таҥаһын уонна уу турбаларын оҥоруу ыытыллар.