Куорат кыраныыссатыгар, Нам уонна Горнай улуустарыгар баһаар бохсулунна

Киин куоракка уонна куорат таһынааҕы сэлиэнньэлэргэ билиҥҥи туругунан куттал суоһаабат. Дьокуускайдааҕы ойуур хаһаайыстыбатын кылаабынай лесничэйэ Юрий Кузьмин иһитиннэрбитинэн, минерализованнай  балаһа үрэхтэргэ диэри оҥоһуллубут. Минерализованнай  балаһа уопсайа 70 км уһуннаах буолбут. Баһаары умуруорууга суһаллык тиийбит тиэхиньикэ көмөтүнэн ыраах сиргэ нэдиэлэ кэриҥэ барбыттар. 
Санатан эттэххэ, ойуур баһаара куорат уокуругун кыраныыссатыгар, Маҥан сэлиэнньэтиттэн 57 км сиргэ турбута. Баһаары салҕыы ыыппат сыалтан Уокуруктааҕы дьаһалта, муниципальнай тэрилтэлэр үлэһиттэрэ уонна Маҥан сэлиэнньэтин олохтоохторо этэрээт тэрийэн баһаары кытта охсуспуттара. Итиннэ 3 бульдозер, 2 уу таһар массыына, 3 «Беларусь» тыраахтар уонна фронтальнай погрузчик үлэлээтилэр.