Куорат Күнүгэр үс сылаас тохтобул аһылынна

Куорат күнүгэр киин куорат Губинскай уокуругун Кыайыы болуоссатыгар оптуобус икки сылаас тохтобула аһылынна. «Кыайыы Болуоссата» тохтобул үөрүүлээх аһыллыытыгар куорат баһылыга Евгений Григорьев, Дьокуускай куорат Думатын бэрэссэдээтэлин бастакы солбуйааччы Евдокия Евсикова кытыннылар. 
«Маннык тохтобуллары үс сыл тухары тутары уонна сүүс ахсааҥҥа тиэрдэри былаанныыбыт. Быйыл 20 сылаас тохтобул баар буолуо. Бу ый бүтүөр диэри өссө 15 тохтобулу үлэҕэ киллэриэхпит. Биһиги тыйыс айылҕабыт усулуобуйатыгар сылаас тохтобул – Дьокуускай куорат тырааныспарын систиэмэтин сорҕото. Чугаһынааҕы сылларга оптуобус пааркатын саҥардыыны уонна уопсастыбаннай тырааныспар саҥа аныгы систиэмэтин оҥорууну былаанныыбыт», – диир  Евгений Григорьев.
Иккис сылаас «Алмазэргиэнбаан» тохтобул Хабаров уулуссатыгар аһылынна. Үөрүүлээх аһыллыыга куорат баһылыгын солбуйааччы Егор Кардашевскай сырытта. 
«Биһиги климаппытыгар сылаас тохтобул олох ирдэбилэ. Маннык тэрээһин ирбэт тоҥ усулуобуйатыгар турар бөдөҥ куорат сайдыытыгар үтүө уларыйыынан буолар», – диэтэ  Егор Кардашевскай.
Бу күн өссө биир «Силуэт» сылаас тохтобул Киров уулуссатыгар үлэҕэ киирдэ. 
Сылаас тохтобуллар тутууларын сакаасчыгынан «Главстрой» МКТ буолар, толорооччу – «Основа» ХЭТ. 
«Главстрой» МКТ специалистара иһитиннэрбиттэринэн, сылаас тохтобулларга монитордар, салгын рециркулятордара, ыскамыайкалар, паандустар, ууруналар, итини сэргэ гаджеттары босхо ииттэрэр розеткалар бааллар. Тохтобулларга видеонан кэтээн көрүү систиэмэтэ, «инфракраснай” ититэр тэриллэр холбоммуттар.