Куорат икки музейыгар аһаҕас аан күннэрэ

Ыам ыйын 18 күнэ – аан дойдуга Музей күнэ. Сылын аайы бэлиэтэнэр үөрүүлээх күн чэрчитинэн СӨ Национальнай уус-уран музейыгар (Киров уул., 9) уонна академик Афанасий Осипов Хартыына галереятыгар (Хабаров уул., 27) бүгүн сарсыарда 10 чаастан киэһэ 18 чааска диэри Аһаҕас аан күннэрэ ыытыллар. Ыалдьыттар мэлдьи баар экспозициялары босхо көрөр кыахтаналлар. 
Музейга кэлбит дьон сүнньүнэн Нуучча уонна Аҕа дойду дьоҕурдаах дьонун XVIII-XXI үйэлэрдээҕи үлэлэрин, Саха сирин XIX-XXI үйэлэрдээҕи кыраасканан суруллубут хартыыналарын, скульптураларын, уус-ураннык оҥоһуллубут туттар тээбириннэрин, М.Ф. Габышев аатынан Галерея арҕаа Европа  XVI-XIX үйэлэрдээҕи дьоҕурун кэллиэксийэтин көрүөхтэрэ.  

Академик А.Осипов Хартыына галереятыгар көрөөччүлэр Арассыыйатааҕы уус-уран үлэлэр Академияларын дьиҥнээх чилиэнэ, ССРС норуодунай худуоһунньуга, Саха АССР искусстволарын үтүөлээх деятелэ, РСФСР И.Е. Репин аатынан Судаарыстыбаннай бириэмийэтин лауреата, СӨ духуобунаска Академиятын бэрэсидьиэнэ, Арассыыйа худуоһунньуктарын сойууһун чилиэнэ, живописец Афанасий Николаевич Осипов (1928-2017) үлэлэрин көрүөхтэрэ. 
Күнү быһа музей экспозицияларынан медиатор арыалдьыттаах босхо көрүү буолуоҕа. Сеанстар чаастара – 12:00, 14:00, 16:00. Эрдэттэн 8 (4112) 33-52-79 нүөмэринэн суруйтарыахха сөп. Миэстэ ахсаана хааччахтаах.  
Пандемиянан сибээстээн музей саалалара тиһигин быспакка санитарнай сууйууну-сотууну ааһаллар уонна көрөөччүлэргэ сыһыаннаах анал быраабыла үлэлиир. Ол туһунан сиһилии музей официальнай сайтыгар киирэн билсиэххитин сөп: http://www.sakhamuseum.ru/news/vremennyye-pravila-muzeya