Куорат Дууматын хамыыһыйатыгар 27 боппуруос көрүлүннэ
2022 сыллааҕы үс муниципальнай бырагырааманы, буруйу оҥорууну сэрэтэр тэрээһиннэри уо.д.а. боппуруостары сэтинньи 16 күнүгэр Дьокуускай куорат Дууматын Николай Васильев бэрэссэдээтэллээх олохтоох бэйэни салайыныыга, сокуоннаска уонна регламеҥҥа сис хамыыһыйатыгар көрдүлэр. Ол туһунан Дуума пресс-сулууспата иһитиннэрдэ.
Хамыыһыйаҕа 27 боппуруос көрүлүннэ, ол иһигэр муниципальнай сулууспалаахтарга сыһыаннаах хааччахтар, кылаастаах чииннэри иҥэрии, пааматынньыгы, мемориальнай дуосканы туруоруу, наҕараадалааһыннар уо.д.а.
Уокуруктааҕы дьаһалта үпкэ Департаменын начаалынньыга Ольга Максимова муниципальнай бырагыраамалар 2022-2024 сылларга үбүлээһиннэрин сабаҕалааһынын уонна хайысхаларын билиһиннэрбит. Бастакытынан, куорат уокуругун территориятыгар информационнай уопсастыба сайдыытыгар уонна цифровой экономиканы төрүттээһиҥҥэ, иккиһинэн, уопсастыбаннай уонна тас сибээстэргэ, куорат уокуругун информационнай бэлиитикэтигэр, үсүһүнэн, буруйу оҥорууну сэрэтиигэ. Бырагыраама тэрээһиннэрин чэрчитинэн, үбүлээһин информационнай систиэмэ куттала суох буолуутугар, уулуссаҕа видеонан кэтээн көрүүгэ уонна «Гражданин-полиция» систиэмэҕэ туһуламмыт. Куорат уулуссаларыгар уонна элбэх киһи мустар сирдэригэр информационнай технология саҥа техническэй сириэстибэлэрэ киирэллэр.
Уокуруктааҕы дьаһалта быраапка Департаменын начаалынньыга Айаал Ноговицын куорат уокуругун Устаабыгар киирбит уларыйыылары иһитиннэрдэ.
Кини быһаарбытынан, федеральнай сокуонунан муниципальнай үлэһиттэргэ тустаах хааччахтааһыннар көрүллэллэр. Холобур, муниципальнай үлэһит омук судаарыстыбатын гражданина буолуо суохтаах, ол эрэн сорох доҕордуу дойдулар гражданнарыгар көҥүллэнэр. Ити куорат баһылыгар, дьокутааттарга уонна сулууспалаахтарга сыһыаннаах.