Куорат Дууматын дьокутааттара Тыа хаһаайыстыбатын управлениетын отчуотун төнүннэрдилэр

Дьокуускай куорат дьаһалтатын Тыа хаһаайыстыбатын отчуотун Куорат дууматын дьокутааттара ситэриигэ ыыттылар. Алтынньы 23 күнүгэр Куорат дууматын Дьокуускай таһынааҕы нэһилиэктэри сайыннарыыга уонна агропромышленнай комплекска хамыыһыйатын мунньаҕа буолан ааста. Ааспыт 9 ый устата Дьокуускай агропояһын сайыннарыы муниципальнай бырагыраама олоххо киириитин уонна хомуур үлэтин туһунан боппуруостары ырытыстылар.

Тыа хаһаайыстыбатын управлениета муниципальнай бырагыраама 85 %, от былаана 103 %, сиилэс 27%, сенаж 36 %  туолбутун туһунан отчуоттаата. Кураан сайын туран, быйыл хортуоппуй былаана 79 % туолбут.

Дьокутааттар мунньах буолуон чаас аҥаара хаалбытын эрэ кэннэ отчуот киирбитин бэлиэтээтилэр. Маны тэҥэ информация чопчута суоҕа, сорох боппуруостар ситэри арыллыбытахтара бэлиэтэннэ. Хамыыһыйа бэрэссэдээтэлэ Прасковья Козлова иһитиннэрбитинэн, билигин фермердэр тустарын информация толорута суох – хайдах үлэлииллэрэ, Тыа хаһаайыстыбатын министиэристибэтиттэн ханнык субсидияны ылбыттара, сүөһү төбөтүн ахсаана – эбилиннэ дуу, көҕүрээтэ дуу, сенаж былаана тоҕо туолбатаҕа быһаарыллыбатах.

Түмүккэ, дьокутааттар боппуруостарыгар ситэтэ суох эппиэттэри иһиттилэр. Бүддьүөт 6 мөл. кыччаабыта билиннэ: дохуот аччаабытыттан уонна муниципальнай бырагыраамалары сарбыйыыттан. Маны таһынан, Дьокуускайга тутуллуохтаах идэһэлиир сыах өрөспүүбүлүкэ таһымыгар үбүлэнэрэ, үбүлэммэтэ эмиэ биллибэт. Араас ыйытыылары дьокутааттар Ольга Саргыдаева,  Евдокия Евсикова, Алевтина Эверстова биэрдилэр. Мунньах түмүгүнэн, хамыыһыйа чилиэннэрин быһаарыытынан, Тыа хаһаайыстыбатын управлениетын отчуота сэтинньигэ көстө.

Дьокуускай куорат Дууматын пресс-сулууспата