Куорат дьокутааттара тиэргэннэр өрөмүөннэрин бэрэбиэркэлээтилэр

Дьокутааттар тиэргэн территорияларын тупсаран оҥорууну, итиэннэ уопсастыбаннай туоналар, пааматынньыктар туруктарын бэрэбиэркэлээтилэр.

Ол курдук, көһө сылдьар мунньах кыттыылаахтара Можайскай уул., 17/5 уонна 17/6, Кузьмин уул., 26/3 уонна 28/3, Лермонтов уул., 138/1 уонна 138/3, Лермонтов, уул., 156 нүөмэрдэригэр сылдьан тиэргэннэри тупсаран оҥоруу хаамыытын кытта билистилэр.

Бэдэрээтчик иһитиннэрбитинэн, урукку бүрүөһүнү көтүрүү, чөҥөчөктөрү түөрэн ылыы, сорох сиринэн буорун уларытыы, бордюр таастарын ууруу уонна ууну сүүрдэр лотоктары оҥоруу үлэтэ түмүктэммит. Билиҥҥи туругунан аспааллааһын, тротуардары уонна бордюрдары ууруу ыытыллар. Аччыгый архитектурнай пуормалар – ыскамыайкалар, хачыаллар уонна ууруналар атыылаһыллыбыттар. Итилэри балаҕан ыйыгар туруораллар.

«Тиэргэн территорияларын тупсаран оҥорууга элбэх үп көрүллүбүтэ.  Үлэ график быһыытынан баран иһэр, алтынньы бүтэһигэр түмүгүн көрүөхпүт», — диэтэ Дьокуускай куораттааҕы Дуума Бэрэссэдээтэлэ Альберт Семенов.

Кэрийэн көрүү кэмигэр дьокутааттар Кыайыы пааркатын, Учууталлар Бульвардарын, Семен Дежнев уонна Абакаяда пааматынньыктарын туруктарын бэрэбиэркэлээтилэр. Түмүккэ Дуума дьокутааттара Олохтоох дьаһалтаҕа пааматынньыктар, мемориальнай дуоскалар уонна да атын өйдөбүнньүк бэлиэлэрин биир кэлим реестрдарын оҥорорго сүбэлээтилэр.