Куорат «дизайн-кодунан» саҥа киоска арылынна

Киин куорат Октябрьскай уокуругун олохтоохторугар үөрүүлээх түгэн тосхойдо. Ол курдук, Ленин пр., 25 аадырыска, «Илин Эҥэр» маҕаһыын таһыгар, хаһыат, сурунаал атыытыгар идэтийэр «Горпечать» тэрилтэ саҥа киоската арылынна.  Аныгылыы оҥоһуулаах, сөбүгэр киэҥ-куоҥ киосканы үөрүүлээх арыйыыга урбаан уонна туризм миниистирэ Тимур Ханды уонна инновация миниистирин э.т. Александр Федотов кыттыыны ыллылар. Урбаан миниистирэ Тимур Ханды бэлиэтээбитин курдук, маннык эбийиэктэр, бастатан туран, үгэс буолбут кумааҕы прессаҕа -  сонуну-нуомаһы хаһыаттан, сурунаалтан, кинигэттэн ыла үөрэммит аҕа саастаах көлүөнэҕэ туһуланаллара чахчы. Оттон инновацияҕа, сыыппара сайдыытыгар уонна инфокоммуникационнай технологияларга миниистир эбээһинэһин толорооччу Александр Федотов бэлиэтээбитинэн, кумааҕы бэчээт 50% чуолаан маннык киоскалар нөҥүө тарҕанар. Иккиһинэн, киоска Дьокуускай куорат «дизайн-кодунан» тутуллубут буолан, аныгылыы көстүүлээх, онон куораты киэргэтэрэ итиэннэ нэһилиэнньэҕэ, ыалдьыттарга сахалыы хаһыаты, сурунаалы, кинигэни, сувениры атыылаһарга табыгастаах миэстэ буолара саарбаҕа суох. Сиһилии: https://yakutia24.ru/stolitsa/v-yakutske-otkryli-gazetnyj-kiosk-gorpechati