Куорат бастыҥ үөрэнээччилэрин чиэстээтилэр
2022 сыл түмүгүнэн бастыҥ ситиһиилэрдээх киин куорат 100 үөрэнээччитигэр 20-лии тыһыынча солкуобай кээмэйдээх бириэмийэлэри туттардылар.
«Ааһан эрэр сылга эһиги араас таһымнаах балаһааккаларга Дьокуускай куорат уонна өрөспүүбүлүкэ чиэһин көмүскээтигит уонна чаҕылхай ситиһиилэрдэннигит», - диэтэ туйгун үөрэнээччилэргэ, олимпиадалар, научнай-практическай конференциялар, араас спортивнай күрэхтэһиилэр кыайыылаахтарыгар уонна көхтөөх үөрэнээччилэргэ туһаайан Дьокуускай куораттааҕы Дуума Бэрэссэдээтэлэ Альберт Семенов.
Кини куорат баһылыгын стипендията үөрэнээччилэргэ салгыы ситиһиилэнэллэригэр төһүү күүһүнэн буолуоҕа, саҥа кыайыыларга кынаттыаҕа диэн эрэнэрин биллэрдэ.
«Ис сүрэхпиттэн иннигит хоту бараргытыгар, хаһан да бэриммэккитигэр уонна сырдыкка, үтүөҕэ эрэнэргитигэр баҕарабын! Ааһан эрэр сылга эһигини үөрдүбүт үтүө түгэн кэлэн иһэр 2023 сылга салҕаннын! Эһиэхэ чэгиэн доруобуйаны, дьолу, Дьокуускай куорат, Саха Өрөспүүбүлүкэтин уонна улахан дойдубут – Арассыыйа туһугар ситиһиилэри уонна салгыы сайдыыны баҕарабын!» - диэн эбэн эттэ Дьокуускай куораттааҕы Дуума Бэрэссэдээтэлэ.
Сонуннар
Ордук ааҕаллар
