Куорат баһылыгын гырааныгар куонкурус түмүктэннэ

Уокуруктааҕы дьаһалтаҕа куорат баһылыгын гырааныгар куонкурус түмүктэрэ таҕыста. 
Уопсастыбаннай суолталаах бырайыактардаах социальнай хайысхалаах кэмиэрсийэтэ суох тэрилтэлэртэн сайаапкалары хомуйуу быйыл муус устар ый 13 күнүттэн ыам ыйын 12 күнүгэр диэри ыытыллыбыт. 
Дьаһалта уопсастыбаннаһы кытта үлэлиир салаата иһитиннэрбитинэн, барыта 12 мөл. солкуобайтан тахса суумалаах 20 сайаапка киирбит. Итинтэн суума аҥаарын кыттааччы киллэрэр. 
Сайаапкалары хомуйуу түмүгүнэн бырайыактары 3 номинациянан араарбыттар:
- социальнай хайысхалаах кэмиэрсийэтэ суох тэрилтэлэри, оҕолорго, уустук балаһыанньаҕа киирбит дьоҥҥо көмөлөһөр аһымал бырайыактары өйөөһүн;
- Наркотигы, итирдэр утахтары утарар хайысхалаах, чөл олоҕу, маассабай спорду, патриотическэй иитиини пропагандалааһын.
- Култуураны уонна искусствоны өйүүр бырайыактар.
2021 сылга олоххо киллэрэргэ хамыыһыйа 8 бырайыагы талбыт. 
«Култуураны уонна искусствоны сайыннарыы» хайысханан 214 тыһ. суумалаах Дьокуускай куорат баһылыгын гыраанын «Молодо-зелено» бибилитиэкэ эдэр үлэһиттэрин ассоциациятын куораттааҕы уопсастыбаннай тэриллиитэ «Правовая семейная онлайн игра «Право-лево» бырайыагынан ылар буолла.  
Социальнай хайысхалаах кэмиэрсийэтэ суох тэрилтэлэри, оҕолорго, уустук балаһыанньаҕа киирбит дьоҥҥо көмөлөһөр аһымал бырайыактары өйөөһүн хайысхатынан баһылык гыраанын ылыахтара:
1. «Сенсорная интеграция» диэн аутизмнаах уонна бытаан сайдыылаах оҕолорго көмөлөһөр дьарыктары ыытыы бырайыага – «Ураты оҕо» автономнай кэмиэрсийэтэ суох тэрилтэ (199 994 солк.);
2. «Саҥа олох» бырайыак – психикаларыгар охсор биэссэстибэлэри туһанар уонна буруйдарын боруостаан тахсыбыт дьону чөлүгэр түһэрэр «Алмаз» социальнай көмүскэл уопсастыбаннай тэрилтэтэ (350 000 солк.);
3. «У нас нет нелюбимых детей» бырайыак – «Подросток» куораттааҕы уопсастыбаннай ыччат тэриллиитэ (212 073 солк.);
4. «Организация вещевого склада и спортивной площадки» – «Линия жизни» Регионнар икки ардыларынааҕы Уопсастыбаннай аһымал Тэриллиитэ (350 090 солк.).
Наркотигы, итирдэр утахтары утарар хайысхалаах, чөл олоҕу, маассабай спорду, патриотическэй иитиини пропагандалааһын номинацияҕа баһылык гыраанын ылыахтара:
1. «Чөл олох – бэтэрээннэргэ» бырайыак – «Ветеран» кулууп уопсастыбаннай тэриллиитэ (246 800 солк.);
2. «Настольный теннис игра для всех» бырайыак – «Доступная среда - Социум» инбэлииттэр социальнай өйөбүллэрин Регионнааҕы уопсастыбаннай тэриллиитэ (237 043 солк.);
3. «Волонтёрский корпус здоровья «Рост» бырайыак – «Дети Солнечного Мира» өрөспүүбүлүкэтээҕи сайдыыларыгар уратылаах оҕолору өйүүр уопсастыбаннай тэриллии (200 000 солк.).