Куорат баһылыга сыл барыллаан түмүктэрин таһаарда

Куорат баһылыга бэлиэтээбитинэн, үлэ түмүгэ куһаҕана суох, сороҕо оннооҕор рекорднай. Ол курдук, куоракка икки оскуола уонна үс спорт объега тутулунна, 38 аадырыска тиэргэн өрөмүөннэннэ (үс сыл иһигэр 128) уонна 13 оскуолаҕа хапытаалынай өрөмүөн оҥоһулунна.

Итини таһынан, Евгений Григорьев иһитиннэрбитинэн, олорор дьиэ тутуутугар сыллааҕы былаан толорулунна – 350 тыһыынча квадратнай миэтэрэ тутулунна, 29 км суол өрөмүөннэннэ, уон сылаас тохтобул туруорулунна уонна 40 оптуобус саҥардылынна.

Итини сэргэ, мэр 2024-2026 сыллары куорат инфраструктуратын сайдыытын үс сылынан биллэрбитин иһитиннэрдэ.

Бу сылларга уопсастыбаннай тырааныспар инфраструктуратын, гаастааһыны сайыннарыыга, ардах уутун сүүрдэр канализацияны, куорат кытыытыгар ыраастыыр тутуулары уонна уунан хааччыйыы систиэмэтин, уулусса сырдатыытын тэрийиигэ күүстээх үлэ ыытыллыаҕа.

«Бу, Дьокуускай маастар-былаана олоххо киириитин чэрчитинэн 2030 сылга диэри, куорат нэһилиэнньэтин олоҕун хаачыстыбатын үрдэтии акылаата буолар», – диэтэ куорат баһылыга.

Итини таһынан, Евгений Григорьев өрөспүүбүлүкэ киин куоратын туруу үлэһиттэрин наҕараадалаата, ол иһигэр, «Дьокуускай үлэҕэ килбиэнэ» мэтээли Маҕан сэлиэнньэтин муниципальнай тиэргэн хомуйааччытыгар Николай Вензельга уонна Олохтоох дьаһалта бочуоттаах грамотатын киин куорат Гражданскай оборонаҕа уонна ыксаллаах быһыыга-майгыга управлениетын быыһааччыта Илья Андреевка туттарда.