16.01.2023 | 16:04

Куорат баһылыга суруналыыстары эҕэрдэлээтэ

Куорат баһылыга суруналыыстары эҕэрдэлээтэ
Ааптар: Айыына ДОНСКАЯ
Бөлөххө киир

Олохтоох дьаһалтаҕа Арассыыйа Бэчээтин күнүгэр анаммыт үөрүүлээх тэрээһиҥҥэ куорат баһылыга Евгений Григорьев информацияны киэҥник тарҕатар тиһиктэр салайааччыларын уонна үлэһиттэрин эҕэрдэлээтэ.

Куорат баһылыга эҕэрдэ тылыгар суруналыыстарга буола турар түбэлтэлэри кэмигэр сырдаталларын, былаас уорганнарыгар түргэнник хамсанарга, быһаарыылары ылынарга кыах биэрэллэрин иһин махталын биллэрдэ.

«Уопсастыбаннай диалог улахан суолталаах, ити суруналыыстыка баар буолан оҥоһуллар. Бүгүн ханнык баҕарар былаас аһаҕас буолуохтаах, нэһилиэнньэ уларыйа сылдьар ирдэбиллэригэр түргэнник хоруйдуохтаах, кириитикэҕэ сөптөөхтүк сыһыаннаһыахтаах. Дьокуускай куорат Олохтоох дьаһалтата информацияны киэҥник тарҕатар тиһиктэри кытта бииргэ үлэлээһин  улахан суолталааҕын өйдүүр уонна суруналыыстары кытта үлэлиир, комментарийдары, быһаарыылары суһаллык биэрэр чопчу сыаллаах», - диэн бэлиэтээтэ Евгений Григорьев.

Идэлээх бырааһынньыктарынан кэллиэгэлэрин «Информационнай технология киинэ» МХТ дириэктэрин солбуйааччыта Любовь Сыроватская эҕэрдэлээтэ.

«Биһиги биир уопсай дьыаланы – хас биирдии куорат олохтооҕор кырдьыктаах информацияны кэмигэр тиэрдиини оҥоро сылдьарбыт үөрүүлээх. Бүгүн өрөспүүбүлүкэ Суруналыыстарын сойууһугар, куонкурус хамыыһыйатын чилиэннэригэр, үлэбитин үрдүктүк сыаналаан, «2022 сыл Бастыҥ пресс-сулууспата» анал бирииһин туттарбыккыт иһин улахан махталбын тиэрдэбит. Эһиги үрдүк сыаныбылгыт пресс-сулууспабыт хамаандатын саҥа бырайыактары оҥорорго, кырдьыктаах информацияны куораппыт олохтоохторугар өссө суһаллык тиэрдэргэ көҕүлүүр», - диэн бэлиэтээтэ Любовь Сыроватская.

Евгений Григорьев куорат социальнай-экономическэй сайдыытыгар кылааттарын, өр сыллаах таһаарыылаах үлэлэрин иһин суруналыыстарга,  өрөспүүбүлүкэтээҕи информацияны киэҥник тарҕатар ситимнэр сүрүн эрэдээктэрдэригэр наҕарадаалары туттартаата.

Харда тылы Саха информационнай агентство эрэдээктэрин солбуйааччы Екатерина Иванова эттэ. Кини Олохтоох дьаһалта пресс-сулууспатын ситиһиилэринэн эҕэрдэлээтэ уонна хаачыстабылаах үлэлэрин, аһаҕастарын, суруналыыстары кытта өрүү сибээскэ сылдьалларын иһин махтанна.

Үгэс быһыытынан, Бэчээт күнүгэр сылын аайы ыытыллар суруналыыстар куораттааҕы күрэстэрин түмүгэ таҕыста.  2022 сыллааҕы куонкурус улахан үбүлүөйгэ – Дьокуускай куорат төрүттэммитэ 390 сылыгар ананна.

Суруналыыстар бастыҥ үлэлэрэ түөрт номинациянан быһаарыллар – хаһыат, телевидение, араадьыйа, интэриниэт-сонуннар. Суруналыыстар куораттааҕы куонкурустарын кыайыылаахтарынан буоллулар:

«Хаһыат нөҥүө бастыҥ ыстатыйалар (ыстатыйалар сериялара» номинацияҕа – «Киин куорат» хаһыат кэрэспэдьиэнэ Розалия Алексеева (Томская)
«Бастыҥ телесюжет (телесюжеттэр сериялара)» номинацияҕа – «Саха» Национальнай көрдөрөр-иһитиннэрэр хампаанньа «Бу Дьокуускай» телевизионнай бырагырааматын эрэдээктэрэ Светлана Элякова
«Бастыҥ радиосюжет (радиосюжеттэр сериялара)» – «Саха» Судаарыстыбаннай телерадиохампаанньа араадьыйанан биэриигэ сулууспатын начаалынньыга, «Дойду тэтимэ» биэрии ыытааччыта Иннокентий Киренскэй
«Бастыҥ интэриниэт-сонуннар» –«Комсомольская правда – Якутия» сетевой таһаарыы кэрэспэдьиэнэ Михаил Горохов.

Кэллиэгэлэрбитин үрдүк ситиһиигитинэн «Киин куорат» хаһыат эрэдээксийэтин уонна ааҕааччыларын аатыттан истиҥник эҕэрдэлиибит!

Сонуннар

Ордук ааҕаллар

Ким? Төһө? Туохха?
Сонуннар | 17.02.2024 | 12:00
Ким? Төһө? Туохха?
Ааҕааччыларбытын кытта Сахастат ааспыт 2023 сыл түмүгүнэн таһаарбыт өрөспүүбүлүкэбит социальнай-экономическай туругун кэккэ чахчыларын кытта үллэстэбит.
Ийэлиин кэпсэтии...
Сонуннар | 16.02.2024 | 18:30
Ийэлиин кэпсэтии...
Анал байыаннай дьайыы тиэмэтин суруйарбар төрөппүтү, ийэни, аҕаны кытта кэпсэтэр ордук ыарахан. Кэпсэтэ олорон бөтө бэрдэрэн, оҕотун санаан, аһынан тохтоон, хараҕын уутун соттон, ол быыһыгар, кини туһунан кэпсиэхтээҕин, кини дьоруойун бар дьон билиэхтээҕин санаан, күүстээх санаатын, тулуурун киллэрэн эмиэ саҥарбытынан барар. Биир сөҕөрүм диэн, маннык кэпсэтиилэргэ биир да төрөппүт, уолаттар...
Ыар сүтүк
Дьон | 17.02.2024 | 16:00
Ыар сүтүк
Үүммүт саҥа сылга Баатара нэһилиэгэ уонна Мэҥэ Хаҥалас улууһа эрэ буолбакка, бүттүүн өрөспүүбүлүкэ ыар сүтүктэннэ.