Куорат баһылыга "Россия24" ханаалга быһа эпииргэ таҕыста

Баһылык «Куттала суох уонна хаачыстыбалаах суоллар» национальнай бырайыак олоххо киириитин, тиэргэн территорияларын тупсарыыны, оттук сезонугар уонна саҥа үөрэх дьылыгар бэлэмнэниини, итиэннэ Дьокуускай куорат төрүттэммитэ 390 сылыгар ыытыллар тэрээһиннэр тустарынан кэпсээтэ уонна куорат олохтоохторун ыйытыктарыгар хоруйдаата.  

Быһа эпииргэ киирбит ыйытыылартан:

23-с оскуола таһыгар 3 маҕаһыын арыгы атыытынан дьарыктанар. Мин көрдөхпүнэ 300 м чугастар. Бу маҕаһыыннар ыраах буолалларын ким ааҕан таһаарарый?

Икки хонугунан саҥа дьаһалбыт үлэлиэҕэ, онно этиллэринэн, арыгы атыылыыр маҕаһыын оҕо тэрилтэтиттэн 300 м ыраах туруохтаах. Аны туран “лжекафелар” диэннэр бааллар, Ил Түмэни кытта үлэлэһэн, сотору 75 оннук кафены сабыахпыт дии саныыбын. ИДьМ бэрэбиэркэлиир, Предпринимательство министиэристибэтэ үлэлиир. Биһиги куорат өттүттэн тутулуктааҕы барытын оҥордубут.

Куорат олохтоохторо миэхэ социальнай ситимнэргэ суруйуоххутун сөп, ЕДДС-ка, ИДьМ-ҥа, Предпринимательство министиэристибэтигэр үҥсүөххүтүн сөп.

Крупская уулуссата хаһан оңоһуллуоҕай?

Быйыл кутуу эрэ ыытылынна. Национальнай бырайыак былааныгар киирбитэ. Чуолкай күнүн-дьылын биллэриэхпит.

Стадухин уул., 80/2 тиэргэммит өрөмүөн испииһэгэр "резерв" диэҥҥэ киирбит этэ. Ол аата эһиил оҥоһуллар дуо?

Резервэҕэ киирбит буоллаххытына өрөмүөн оҥоһуллуон сөп. Билигин чуолкай аадырыстарынан эппэппин, үлэһиттэрбит тахсан быһаарыахтара.

Быйыл Уһук Илиҥҥэ үлэлиир бырагырааманан, 75 тиэргэни оҥордубут. Кэнники уон сыл устата маннык элбэх тиэргэн өрөмүөннэнэ илигэ. Кэлэр сылга 30-тан тахса тиэргэн оҥоһуллуохтаах.

Мархаҕа Лобановка уулуссаҕа хаһан гаас киириэҕэй? Нам суолун уҥа өттө, 10 км.

Быйыл Нам суолун 13 км уҥа өттүгэр гаас киирдэ. Гаас ситимин аһардар кыаҕа намыһах, ону үрдэтэргэ тустаах тэрилтэлэргэ элбэх үлэ ыытыллар. Онтон салгыы гаас ситимэ хайаан да тардыллыахтаах. Эһиги уулуссаҕыт хас сыллаах былааҥҥа турарын биллэриэхпит.

Быһа эфиргэ кыайан киирбэтэх ыйытыктары баһылыкка тиэрдэллэр.