Куорат баһылыга президеҥҥэ Дьокуускай таһынааҕы балаһыанньа туһунан биллэрдэ

Евгений Григорьев ууга барааһын уонна ойуур баһаардарын содулларын туоратыыга анаммыт Арассыыйа президенэ Владимир Путин ыыппыт мунньаҕар кытынна. Дойду салайааччыта аэропорт саҥа балаһата Бе-200 сөмөлүөттэри түһэрэргэ туттулларын туһунан эттэ. 
Куорат баһылыга Дьокуускайга буруонан сибээстээн балаһыанньа уустугун туһунан иһитиннэрдэ. Хойуу буруонан сибээстээн, 41 киһи доруобуйатын туруга мөлтөөн, мэдиссиинискэй өҥөнөн туһаммыт. Кини эппитинэн, Дьокуускай кыраныыссатыгар ойуур баһаарын бохсутууга үлэ ыытыллар, 90 киһи уонна 9 тиэхиньикэ үлэлииллэр. 
Президент туох эбии көмө нааданый диэн ыйытыгар Евгений Григорьев маннык хоруйдаабыт: «Авиацияны кэтэһэбит. Уу кутар бөртөлүөт үлэбитин чэпчэтиэ этэ. Үлэ ыраах, тиийэргэ уустук сирдэргэ ыытыллар».
«Евгений Николаевич, Эн көрдөһүүгүнэн бэҕэһээ Ростехнадзор, Росавиация салайааччыларын уонна тырааныспар миниистирин кытта кэпсэппитим. Кинилэр Бе-200 сөмөлүөт түһэригэр уһун балаһаны туттар боппуруоһу быһаарыахтара, биллэн турар, куттал суох буоларын курдук бары ирдэбиллэри тутуһан туран», — диэтэ Владимир Путин.
Маҥан сэлиэнньэтин таһынааҕы ойуур баһаарыгар, күн-дьыл сөп түбэстэҕинэ, уу кутар бөртөлүөттэр үлэлиэхтэрэ. РФ ЫБММ баһылыга Евгений Зиничев президеҥҥэ буруоннан сибээстээн билиҥҥи туругунан авиацияны туттар кыах суоҕун бэлиэтээтэ.