Куорат баһылыга алкомаркеттары социальнай тэрилтэлэртэн тэйитэргэ эттэ

Куорат баһылыга Евгений Григорьев алкомаркеттар уонна социальнай тэрилтэлэр икки ардыларын тэйитэргэ этии киллэрдэ. Ол туһунан Уокуруктааҕы дьаһалта пресс-сулууспата иһитиннэрдэ. 
Куораттааҕы уопсай планеркаҕа баһылык нормативнай-быраап  аакталарыгар уларытыыны киллэрэргэ сорудахтаабыт. 
Итини сэргэ кини билиҥҥи усулуобуйаны анаалыстыырга, итирдэр утахтары атыылыыр маҕаһыыннар уонна социальнай суолталаах тэрилтэлэр икки ардыларын улаатыннарар туһунан этиилэри киллэрэргэ сорудах биэрбит. 
Иһитиннэриигэ этиллэринэн, нормативнай-быраап  аакталарыгар уларытыы киллэрдэххэ итирдэр утаҕы атыылыыр сирдэр ахсааннарын аҕыйатыахха сөп эбит. 
«Бүгүҥҥү күҥҥэ куоракка 800-чэ маҕаһыын уонна алкомаркет хас хардыы аайы баарын олохтоохтор сөбүлээбэттэрин биллэрэллэр. Маннык атыы-эргиэн эбийиэктэрэ тэйиччи турар боппуруостарын быһаарарга көрдөһөбүн. Эрдэттэн суоттаан, сыаналаан, социальнай тэрилтэлэртэн тэйитэргэ хас эбийиэк сабыллыан сөбүн», - диэбит Евгений Григорьев. 
Ити боппуруоһу баһылыгы экэниэмикэҕэ уонна үпкэ солбуйааччы Георгий Гаврильев хонтуруоллуур.