Култуура уонна сынньалаҥ пааркатын сайдыытын дьүүллэстилэр

Олохтоох дьаһалта IT-CUBE балаһааккатыгар тэрийбит стратегическай сессиятыгар Мокватааҕы «КБ Стрелка» консалтинговай хампаанньа экспертэрэ кытыннылар.

Сессия модератордара – «КБ Стрелка» Куорат антропологиятын киинин салайааччыта Михаил Алексеевскай, архитектор уонна Арассыыйаҕа, Европаҕа уонна Кытайга үлэлээбит уопуттаах куораты тутааччы, архитектурнай наука кандидата Анна Ленц уонна «КБ Стрелка» сүрүннүүр архитектора, бырагыраамалааһын уонна куорат аһаҕас туоналарын тупсаран оҥоруу эйгэтигэр исписэлииһэ Петр Емельянов.

Стратегическай сессия кыттыылаахтара саҥардыллыбыт паарка хайдах буолуохтааҕын, куорат олохтоохторо тугу баҕаралларын, туох сервиснэй инфраструктура ирдэнэрин, кыһыҥҥы өттүгэр паарканы хайдах туһаныахха сөбүн, салайыы систиэмэтин көрүҥнэрин дьүүллэстилэр. Санаа атастаһыытыгар архитектура, куораты тутуу эйгэтин  экспертэрэ, куорат дьаһалтатын, урбаан бэрэстэбиитэллэрэ, куорат көхтөөх олохтоохторо кытыннылар.

 Куорат баһылыгын солбуйааччы Антон Алексеенко бэлиэтээбитинэн, Киин култуура уонна сынньалаҥ паарката куорат агломерациятын сайдыытын маастар-былааныгар сүрүн хайысхалартан биирдэстэрэ буоларын бэлиэтээтэ.

«Экспертнэй стратегическай сессияҕа паарка ханнык хайысханан сайдыахтааҕын торумнуубут. Сессия чэрчитинэн, паарка куорат олохтоохторо уонна ыалдьыттара сөбүлээн сынньанар сирдэрэ буоларын курдук, элбэх киһи санаатын истэ сатыыбыт», - диэтэ Антон Алексеенко.

Архитектор уонна куораты тутааччы, архитектурнай наука кандидата Анна Ленц санаатын чопчу үллэһиннэ.

«Түөрт сүрүн кыһалҕа баар. Бастакыта – мөлтөх бренд. Паарка куорат олохтоохторугар ураты, бэлиэ сир буолбатах.  Иккиһинэн, эйгэтэ намыһах хаачыстыбалаах. Паарка уопсастыбаннай туоналар тупсаран оҥорууларын аныгы халыыбыгар сөп түбэспэт. Үсүһүнэн, хаачыстыбалаах инфраструктура тиийбэт. Куорат пааркатыгар бэлиэ эбийиэктэр суохтар, инфраструктура эргэрбит. Төрдүһүнэн, сырыы аҕыйах. Пааркаҕа киһи мэлдьи элбэх курдук, ол эрэн кинилэр территория 10%-гар эрэ иллэҥ кэмнэрин атаараллар. Итиэннэ дьон пааркаҕа сылга биирдэ эрэ сылдьар», - диэтэ Анна Ленц.

Куорат антропологиятын киинин салайааччыта Михаил Алексеевскай бэлиэтээбитинэн, куорат паарката Дьокуускай биир саамай кэрэ көстүүлээх сиринэн буолуохтаах.

«Стратегическай сессия биир сүрүн соруга – пааркаҕа дьону төгүрүк сыл сырытыннарыы. Биллэн турар, тыйыс усулуобуйалаах сиргэ ити уустук сорук. Ол эрэн атын экстремальнай килиимэттээх куораттарга уопсастыбаннай туоналары сайыннарыы уопута баар. Дьокуускай паарката сайдар кэскилэ улахан, эбийиэк куорат биир кэрэхсэбиллээх сиринэн буоларын курдук элбэх үлэ күүтэр», - диэн бэлиэтээтэ Михаил Алексеевскай.

Киин култуура уонна сынньалаҥ пааркатын уларытан оҥоруу чэрчитинэн «Создание рекреационно-досугового комплекса» бырайыак олоххо киирэрэ былааннанар. Бырайыак кэлэр сылга саҕаланыаҕа уонна икки сыл устата олоххо киириэҕэ. Паарканы тупсаран оҥоруу үлэтэ быйылгыттан саҕаланар, бастакынан киин аллея өрөмүөннэниэҕэ.