«Кросс нации-2022»: Дьокуускайга 8 тыһыынча кэриҥэ киһи сүүрдэ

Сүүрүүгэ өрөспүүбүлүкэ физическэй култуураҕа уонна спортка миниистирэ Леонид Спиридонов, М.К. Аммосов аатынан ХИФУ ректора, норуодунай дьокутаат Анатолий Николаев кытыннылар. Күрэхтэһии кылаабынай судьуйата – өрөспүүбүлүкэтээҕи категориялаах судьуйа Альберт Трофимов.

Куорат баһылыга Евгений Григорьев тэрээһин аһыллыытыгар сүүрүүгэ кыттар идэтийбит спортсмен, сүүрүүнү сэҥээрээччилэр, чөл олоҕу тутуһааччылар ахсааннара сылын аайы эбиллэн иһэр, быйылгы кросска 8 тыһыынча кэриҥэ киһи сүүрэр диэн бэлиэтээтэ.

«Саха АССР тэриллибитэ 100 уонна Дьокуускай куорат төрүттэммитэ 390 сылларынан бу сайын бастакы марафоммутун ыыппыппыт. Марафону сылын аайы тэрийэ сатыахпыт», - диэтэ Евгений Григорьев.

Куорат баһылыга физкультура уонна спорт сайдыытыгар улахан кылааттарын иһин «Дьокуускай куорат төрүттэммитэ 390 сылынан» үбүлүөйдээх бэлиэлэри 1 №-дээх Оҕо спортивнай оскуолатын чэпчэки атлетикаҕа тренер-преподавателигэр Василий Алексеевка, «Стройподрядник» ХЭТ генеральнай дириэктэрэ Виктор Салтыковка, СӨ физкультураҕа уонна спортка үтүөлээх үлэһитэ Галина Сырмолотоваҕа туттарда.

СӨ физическэй култуураҕа уонна спортка миниистирэ Леонид Спиридонов бэлиэтээбитинэн, сүүрүү өрөспүүбүлүкэ бүттүүнүгэр ыытылынна.

«Биһиги өрөспүүбүлүкэбитигэр физкультура уонна спорт сөбүлүүр дьарыктарбытынан хаалаллар. Ону бүгүҥҥү Дьокуускай куоракка ыытыллар «Кросс нации» бигэргэтэр», - диэтэ миниистир.

Кини «Саха АССР тэриллибитэ 100  сыла» үбүлүөйдээх бэлиэни СӨ үтүөлээх тренеригэр Василий Кононовка туттарда.

«Кросс нации – 2022» сүүрүүнү чэпчэки атлетика күүстээх спортсменнэрэ арыйдылар. Кинилэр кэннилэриттэн оскуола оҕолоро, тэрилтэ салайааччылара, доруобуйаларынан хааччахтаах дьон, куорат олохтоохторо сүүрдүлэр.

Сүүрүү Сэргэлээхтиир суолтан саҕаланан баран «Юность» стадиоҥҥа түмүктэннэ.