Ковид уонна грипп вирустарынан тэҥҥэ ыалдьыахха сөп

Өрөспүүбүлүкэ Ил Дархана Айсен Николаев Доруобуйа харыстабылын, итиэннэ Үөрэҕирии уонна наука министиэристибэлэригэр эпидсезоҥҥа бэлэмнэнэргэ сорудахтаата. Оскуолаларга уонна оҕо уһуйааннарыгар сарсыардааҥы фильтрация, бактерициднай лаампалары уонна рециркулятордары туттан салгыны ыраастааһын, хостору дезинфекциялааһын булгуччу оҥоһуллуохтаах.

Саха сиринээҕи Роспотребнадзор Управлениетын салайааччыта Маргарита Игнатьева информациятынан, билиҥҥи кэмҥэ санитарнай-эпидемиологическай балаһыанньа бигэ туруктаах. «Саҥа дьыл бырааһынньыгын иннинэ ОРВИ, грипп уонна коронавирус таһыма намтаабыта. Ол эрэн, оскуолаларга үһүс чиэппэр саҕаланыаҕыттан үөрэнээччилэр  уонна өрөспүүбүлүкэ нэһилиэнньэтин ортотугар ыарыы ахсаана сыыйа үрдүүрэ сабаҕаланар», – диэтэ кини.

Ахсынньы бүтэһигэр Саха сирин үрдүнэн үксүн А(H1N1)2009 штаммнаах (свиной грипп) ыарыы вирустара регистрацияламмыттар. «Итиннэ В грипп холбосто, дьон тэҥинэн ковидынан уонна грибинэн ыалдьар түбэлтэлэрэ регистрацияланар», – диэн иһитиннэрдэ Маргарита Игнатьева.