Коронавирус хааччахтааһыннарын сымнатыы саҕаланна

Өрөспүүбүлүкэ үрдүнэн коронавируһу кытта сибээстээх эпидемиологическай быһыы-майгы тупсан иһэрин учуоттаан регион салалтата хааччахтааһыннары сымнатар туһунан быһаарыыны ылынна. Саха сиринээҕи кылаабынай судаарыстыбаннай санитарнай быраас этиитигэр олоҕуран, олунньу 19 күнүгэр Ил Дархан Айсен Николаев туһааннаах ыйаахха илии баттаата. Бу туһунан Саха Өрөспүүбүлүкэтин Баһылыгын уонна Бырабыыталыстыбатын пресс-сулууспата иһитиннэрдэ.
«Хааччахтыыр миэрэлэри түһүмэҕинэн устабыт – ыарыыны кытта сибээстээх балаһыанньа хайдах буолан иһэриттэн көрөн. Салгыы эпидемиологическай быһыы-майгы тубустаҕына миэрэлэри сымнатарга саҥа быһаарыылары ылыныахпыт», – диэтэ Айсен Николаев.
Ыйаахха ололуран, үлэнэн хааччыйааччыларга дистанционнай көрүҥүнэн үлэлии олорор дьон ахсаанын 50%-тан 30% диэри аҕыйатарга сүбэлэннэ. 
Киин куорат территориятыгар баар атыы тэрилтэлэригэр, атыылыыр-саататар кииннэргэ, атыы комплекстарыгар, дьаарбаҥкаларга, ырыынактарга хас бэнидиэнньик уонна оптуорунньук ахсын хатаан туран дезинфекцияны ыытыы тохтотулунна. Ол курдук, эбийиэктэр үлэлии турдахтарына дезинфекция оҥоһуллар буолар. 
Итини тэҥэ официальнай, былааҥҥа киирбит спорт тэрээһиннэрин СӨ Роспотребнадзор Управлениетыттан сөбүлэҥ ылбакка ыытыы көҥүллэннэ. Ол эрэн, тэрээһин көрөөччүтэ суох ыытыллыахтаах. 
Олунньу 21 күнүттэн 2022 сыл олунньу 04 күнүнээҕи 58н №-дээх Арассыыйа доруобуйа харыстабылыгар Министиэристибэтин бирикээһэ олоххо киирдэ. Итиннэ олоҕуран, ыарыыны сэрэтэр быһыыны ылыы, эбэтэр вакцинация доруобуйа туругунан көҥүллэммэтин уонна ыалдьан аһарбыт туһунан QR-кодтаах медицинскай сертификат саҥа пуормата бигэргэтилиннэ. Саҥа сертификакка COVID-19 көбүтээччитигэр утарылаһар G иммуноглобулин баарын чинчийии туһунан түмүктээх сыһыарыы эбилиннэ.   
Билигин медицинскай тэрилтэҕэ көрдөрүммэккэ, эбэтэр чэпчэки көрүҥүнэн ыалдьыбыт гражданнар итинник сертификаты судаарыстабыннай өҥө Биир кэлим порталын нөҥүө «антителаҕа» тиэстэрэ положительнай түмүктээх буоллаҕына 6 ый болдьохтоох ылыахтарын сөп. 
Итини сэргэ, олунньу 21 күнүттэн тыйаатырдар, култуура дьиэлэрин уонна да атын култуура тэрилтэлэрин үлэлэрэ сөргүтүлүннэ. Сүрүн усулуобуйа – көрөөччү саалата 50% туолуохтаах.