Коронавирус дьаҥа сытыырхайар

СӨ бырабыыталыстыбатын сайтыгар этиллэринэн, доруобуйа харыстабылын миниистирэ Елена Борисова регионнааҕы коронавирус дьаҥын кытта охсуһар суһал штаб мунньаҕар ыарыы оҕо күүтэр дьахталлар уонна оҕолор ортолоругар элбээбитин этэр. 
«Коронавирус дьаҥа оҕо күүтэр дьахталлар ортолоругар элбээтэ. Билиҥҥи туругунан 59 дьахтар ыарыйда, ол иһигэр уустук түбэлтэлэр бааллар», — диир Елена Борисова.
Итини тэҥэ миниистир ыарыы 7-14 саастаах оҕолор ортолоругар ордук тарҕанна диэн бэлиэтиир.
Елена Борисова куойкалары элбэтэргэ кыах баарын уонна өрөспүүбүлүкэҕэ медицина үлэһиттэрин ахсаана тиийэрин эбэн этэр. 

Миниистир кэпсээбитинэн,  өрөспүүбүлүкэҕэ барыта 113 299 киһи вакцинацияламмыт, олортон 91 513 киһи толору кууруһу ааспыт, ол иһигэр 29 тыһыынчаттан тахса саастаах дьон. Аҕа саастаах нэһилиэнньэ өттүттэн вакцинация ылар киһи ахсаана элбээбит. Саха сиригэр барыта коронавируһу утары 136 тыһыынча доза вакцина кэлбит. 
Саха сирин кылаабынай санитарнай бырааһа Маргарита Игнатьева суһал штаб мунньаҕар эппитинэн, коронавирус дьаҥынан офистар үлэһиттэрэ үгүстүк ыалдьар буолан эрэллэр. Эпидемиологическай турук мөлтөөбүтүнэн сибээстээн кини үлэнэн хааччыйааччыларга үлэһиттэрин дистанционнай көрүҥҥэ көһөрөллөрүн сүбэлээтэ. 
Коронавируһу кытта охсуһар федеральнай суһал штаб дааннайдарынан, пандемия саҕаланыаҕыттан 36 422  киһи ыалдьыбыт (суукка иһигэр 105 киһи эбиллибит. Бу дьаҥ содулуттан 622 киһи олохтон туораабыт (суукка иһигэр 2 киһи эбиллибит).