Комсомол күнүгэр – саҥа документальнай киинэ

Саха АССР оскуолаларын ыраах 1985 сыллаахха бүтэрбиттэр оҕо, эдэр саастара Комсомол аатын кытта быстыспат ситимнээх.

Ол курдук, 2019-2020 сылларга бүтүн өрөспүүбүлүкэни тилийэ көппүт ҮТҮӨ ДЬЫАЛА КУБОГА хамсааһыннарын сырдатар документальнай киинэлэрин бастакы түһүмэҕэ лоп-бааччы КОМСОМОЛ күнүгэр таҕыста. Киинэ күн сирин көрөрүгэр Маргарита Степанова (Үөһээ Бүлүү-85), Лилиана Антонова (Бүлүү-85) уонна видеооператор, монтажник Айаал Евдокимов састааптаах айар бөлөх үлэлээбиттэр.

Киинэ ҮТҮӨ ДЬЫАЛА КУБОГЫН идейнэй көҕүлээччи «Ньурба-85» бөлөх өрөспүүбүлүкэ улуустарынан тыһыынчанан үтүө дьыаланы оҥорбут КУБОК хайдах үөскээбитин, туох сыаллаах-соруктаах төрүттэммитин, бастакы үтүө дьыалаларын кэпсииллэриттэн саҕаланар.

Салгыы КУБОГЫ «Үөһээ Бүлүү-85” бөлөххө историческай туттарыы, ол дьоһун түгэҥҥэ Дьокуускайтан анаан-минээн автодесант айана, тэрээһин суолтатын, ис хоһоонун арыйар интервьюлар киирбиттэр. "Үс улуус 85-тэрэ биир күн үтүө дьыаланан - Далырга" диэн ааксыйанан ис хоһоонун өссө чиҥэтэн, арыйан көрдөрбүттэр.

Ол кэннэ “Бүлүү-85”-тэр ҮТҮӨ ДЬЫАЛА КУБОГЫН иитинэн үйэлээх тутуулары ылсан, үөлээннээхтэригэр холобур буолбуттара кэпсэнэр.

Көрөөччүгэ бырайыак бүгүҥҥү ыччакка иитэр-үөрэтэр кылаатын «Выпуск-85» уопсастыбаннай түмсүү салайааччыта Алексей Васильев кэпсиирэ ураты суолталаах.

Ол курдук, ҮТҮӨ ДЬЫАЛА КУБОГА бырайыакка үс бастакы улуус хайдах тэриммиттэрин көрөн, ону сайыннаран, КУБОК салгыы Сахабыт сирин бары улуустарынан эргийэн, Саха АССР оскуолаларын 1985 сылга бүтэрбиттэри түмпүтэ, сомоҕолообута, биир тыыннаабыта.

Бүгүн ыал ийэлэрэ, аҕалара, эбээлэрэ, эһээлэрэ буолан олорор оччотооҕу комсомолецтар эдэрдии эрчимнэрин, хомсомуоллуу төлөннөрүн ыһыктыбаттар.