Колл-кииҥҥэ күн устата 10 тыһыынча киһи эрийэр

Ааспыт нэдиэлэ бээтинсэтигэр өрөспүүбүлүкэтээҕи доруобуйа харыстабылын Министиэристибэтэ коронавируһу кытта сибээстээх «122» биир кэлим итии линиятыгар бэйэтин штабын тэрийдэ. Суукка иһигэр диспетчердэргэ 10-ча тыһыынча Саха сирин олохтоохторо эрийэллэрин туһунан «Саха сирэ 24» телеханаалга колл-киин салайааччыта Аида Коростылева иһитиннэрдэ. 
Ити линия үс түһүмэҕинэн үлэлиир: сарсыарда 8.00 чаастан 14.00 диэри, күнүс 14.00 чаастан 20.00 диэри уонна түүн 20.00 чаастан 8.00 диэри (олохтоох бириэмэнэн).
«Ордук элбэх киһи сарсыардааҥы кэмҥэ эрийэр, ол иһин сарсыардааҥы уонна күнүскү сменаҕа 50-нуу киһи үлэлиир. Түүҥҥү өттүгэр дьуһуурунай бөлөх коронавируһу кытта сибээстээх экстреннэй ыҥырыылары кытта үлэлиир, ити эбии 30 диспетчер. 24 чаас иһигэр 130 диспетчер уонча тыһыынча киһини кытта үлэлиир», – диэтэ Аида Коростылева.
Итини таһынан, биир кэлим итии линия диспетчердара Дьокуускай куорат түөрт поликлиникатын колл-кииннэрин кытта бииргэ үлэлииллэр – ыарыһах «122» нүөмэргэ эрийэн атын поликлиниканы кытта холбуулларын курдук көрдөһүөн сөп, оччоҕо, холобур бырааһы ыҥырыы тустаах медицинскай тэрилтэ колл-киинин исписэлииһигэр көһөр. 
«Ити курдук, биһиги уонна поликлиникалар диспетчердарын барыларын аахтахха сибээскэ 105 киһи баар. Кэнники күннэргэ наһаа элбэхтик эрийэллэр, салгыы төгүрүк суукканан үлэлиибит. Диспетчердэрбит эбиэккэ да барбаттар – сменаларын быыһыгар сынньаналлар. Итии линияҕа эппиэти күүтүү ортотунан 60 сөкүүндэҕэ тэҥнэһэр, ол эрэн наһаа элбэх киһи эрийдэҕинэ, холобур, бэнидиэнньик сарсыарда, күүтүү алта мүнүүтэҕэ диэри уһуон сөп», – диэн чуолкайдаата колл-киин салайааччыта.