Кикбоксиҥҥа чемпион уонна түөрт призер

Вадим Колтовской – Арассыыйа чемпиона!

Ульяновскайга бары көрүҥнэргэ кикбоксиҥҥа Арассыыйа чемпионата түмүктэннэ. Саха хамаандатыттан (сүрүн тренер Андрей Алексеев) 12 спортсмен кытынна. Күрэхтэһии 37 регионтан 500 кэриҥэ кикбоксеры түмтэ. «Волга-Спорт-Арена»  спортивнай комплекс рингэтигэр аан дойдутааҕы спорт маастара, Европа чемпиона Вадим Колтовской бастыҥ ситиһиилэннэ. Кини өрөспүүбүлүкэтээҕи сүүмэрдэммит хамаандалары бэлэмниир киин иитиллээччитэ.  57 кг диэри ыйааһыннаахтарга  К1 диэн биир саамай хабыр көрүҥҥэ кииристэ.

Финалга тахсары быһаарар киирсиигэ саха Чечня өрөспүүбүлүкэтиттэн  РФ спордун маастара Хамид Пасхаевы очконан кыайда.

Финалга  саха файтера Марк Валович диэн  Санкт-Петербургтан сылдьар маастарга кандидаты  нокаукка ыытта уонна үһүс төгүлүн Арассыыйа  чемпионун үрдүк аатын сүктэ!

Чемпионат балаһыанньатынан, Вадим Европа чемпионатыгар  кыттар быраабы ылла. Ити күрэхтэһии ахсынньы саҥатыгар Анталияҕа буолуохтаах.

Вадим Колтовской бу спорт көрүҥүнэн дьарыктаммыта ыраатта. Эдэрдэргэ аан дойду Кубогын хаһаайына, устудьуоннарга аан дойду чемпиона. Алта төгүл  дойду чемпионаттарын финалыгар тахсыбыта.

Аан дойду кылаастаах маастар Айаал Местников (54 кг,  лоу-киктаах фулл-контакт) икки кыайыы кэнниттэн Арассыыйа уонна Европа кыайыылааҕа Свердловскай уобаластан кэлбит Иван Булдаковка быһаарыылаах киирсиигэ  баһыйтарда. Төһө да утарсыы күүстээҕин иннигэр, 0:5 ахсаанынан кыайтарда.

Биһиги хамаандабыт эбии өссө үс боруонса мэтээллээх эргилиннэ.

Хаартыскаҕа: Ульяновскай-2020. Кикбоксиҥҥа Вадим Колтовской (ортоку) Арассыыйаҕа үсүһүн бастаата.