Киин уокурукка социальнай эбийиэктэри тутуу уонна суол өрөмүөнэ салҕанар

Олунньу 8 күнүгэр Евгений Григорьев Киин уокурук олохтоохторун иннигэр отчуоттаата.
Баһылык 2023 сыл сүрүн ситиһиитинэн Владимир Путин Дьокуускай куорат 2030 сылга диэри сайдыытын маастар-былаанын өйөөбүтүн итиэннэ дойду бэрэсидьиэнэ көҕүлээһинэн олоххо киллэриллэр «Доруобуйа», «Үөрэхтээһин», «Куттала суох уонна хаачыстыбалаах суоллар», «Олорор дьиэ уонна куорат эйгэтэ» национальнай бырайыактары ааттаата.
Маны сэргэ Дьокуускай куоракка биллэриллибит Үс сыллаах тупсарыы сылын түмүктэрин, маастар-былаанынан 300-тэн аҕыйаҕа суох тиэргэҥҥэ тупсарыы үлэтэ ыытыллыахтааҕын иһитиннэрдэ.

Чуолаан киин уокурукка 2023 сылга 26 №-дээх оскуола дьиэтигэр эбии куорпус тутуллубутун, 5, 7, 26 №№-дээх оскуолаларга уонна Саха гимназиятыгар хапытаалынай өрөмүөн ыытыллыбытын, 29 №-дээх оскуолаҕа салҕааһын тутуллан эрэрин, доруобуйа харыстабылын эйгэтигэр уокурук территориятыгар Өрөспүүбүлүкэтээҕи Онкология диспансера үлэҕэ киирбитин кэпсээтэ.
Суол тутуутугар Ленин проспегын Хабаров уулуссатыттан Краснояров уулуссатыгар диэри кэрчигэр хапытаалынай өрөмүөн түмүктэммит, Аржаков уулуссатын Чернышевскай уулуссатыттан Киров уулуссатыгар диэри кэрчигэр, Поярков уулуссатын Дзержинскэй уулуссатыттан Октябрьскай уулуссатыгар диэри кэрчигэр өрөмүөн ыытыллыбыт, Хаан ыстаансыйатыгар киирэр суол оҥоһуллубут, сылаас тохтобуллар үлэҕэ киирбиттэр.

Хаарбах дьиэттэн көһөрүү өрөспүүбүлүкэтээҕи аадырыстаах бырагырааматынан 16 дьиэттэн 56 киһи саҥа дьиэлэммит, муниципальнай бырагырааманан - 20 дьиэттэн 18 киһи. Маны таһынан бүддьүөтү таһынан үбүнэн 11 дьиэттэн 31 киһи саҥа дьиэлэммит,  Пушкин уулуссатын, 19 аадырыска турбут хаарбах дьиэ көтүрүллүбүт.
Баһылык 2024 сылга бу үлэ барыта салҕаныаҕа диэн иһитиннэрдэ. Ол иһигэр Ленин проспегын, Култуура уонна сынньалаҥ пааркатын саҥардыы, 29 №-дээх оскуолаҕа уонна Куорат лицейигэр салҕааһын тутуу ыытыллыаҕа. Хабаров уулуссатыгар Ярославскайтан Богатырев уулуссатыгар диэри хапытаалынай өрөмүөн былааннанарын кэпсээбитин нэһилиэнньэ биһирии иһиттэ.