Киин уокурукка икки тиэргэн тупсарыллар

Киин уокурукка быйыл тиэргэни тупсарыы үлэтэ икки аадырыска ыытыллар –Ленин пр., 11 уонна Ленин пр., 38. 
Бэс ыйын 10 күнүгэр куорат баһылыгын солбуйааччы Антон Алексеенко Ленин пр., 11 олохтоохторун кытта көрсөн, тупсарыы бырайыагын дьүүллэстэ. 
Ол курдук, бу сайын манна аспаал, бордюр саҥардыллаары турар, оҕо балаһааккката тутуллуоҕа, массыына туруорар, бөх тоҕор миэстэлэр тэриллиэхтэрэ, олохтоохтор өссө бөҕү наардаан тоҕор контейнейдары туруортарар былааннаахтар.
Ити курдук, тиэргэни тупсарыынан куорат салалтата нэһилиэнньэни кытта көрсүһүүлэрэ түмүктэнэн эрэр. Аны Ленин пр., 38 дьиэтин олохтоохторун кытта көрсүһэр хаалла. Онон аны күһүн олохтоохтор өрөмүөннэммит, саҥардыллыбыт тиэргэннэри эрэ күүтэллэр. Онуоха диэри хонтуруол, хонтуруол уонна өссө төгүл хонтуруол! Хаачыстыбата суох, итэҕэстээх-быһаҕастаах үлэлэри бэдэрээтчиттэр бэйэлэрин суоттарыгар көннөрөр буоланнар, кинилэр даҕаны өттүлэриттэн хаачыстыбалаах үлэҕэ дьулуур баара саарбахтаммат. 
Санатар буоллахха, быйыл сайын Дьокуускай куоракка «Уһук Илиҥҥэ 1000 тиэргэн» федеральнай бырагырааманан 15 тиэргэҥҥэ тупсарыы үлэтэ ыытыллар. Дойду баһылыгын боломуочуйалаах бэрэстэбиитэлэ Юрий Трутнев көҕүлээһининэн 2021 сылтан үлэлиир бырагыраама Дьокуускай куорат маастар-былаанын олоххо киллэрии иитинэн 2030 сылга диэри уһатыллыбыта, диэн иһитиннэрэр Олохтоох дьаһалта пресс-сулууспата.