Киин куорат улахан оскуолаларыттан биирдэстэрэ үлэҕэ киирэрэ чугаһаата

Бу күннэргэ СӨ Бырабыыталыстыбатын Бэрэссэдээтэлэ  Андрей Тарасенко уонна куорат баһылыга Евгений Григорьев «Прометей» дьоҕус оройуонугар сылдьан 990 миэстэлээх оскуола кыбаартал хочуолунайын тутуутун бэрэбиэркэлээтилэр. Көһө сылдьар мунньахха өрөспүүбүлүкэ министиэристибэлэрин уонна биэдэмистибэлэрин салайааччылара, Олохтоох дьаһалта структурнай салаалара кытыннылар. Бу туһунан Олохтоох дьаһалта пресс-сулууспата иһитиннэрдэ.
Саҥа оскуоланы СӨ үөрэҕириигэ уонна наукаҕа Министиэристибэтэ Дьокуускай куоракка биэрэр. Тутааччы – «Прометей» ХЭТ, бүгүҥҥү күннээҕи туругунан эбийиэк тутуута 80 % түмүктэннэ. Саҥа оскуола «Үөрэҕирии» национальнай уонна «Аныгы оскуола» регионнааҕы бырайыактар чэрчилэринэн тутуллар.

Куораты тутуу уонна тырааныспар инфраструктуратын Департаменыгар иһитиннэрбиттэринэн, кыбаарталлааҕы хочуолунайдаах эбийиэк барыллаан сыаната 1 млрд 427 мөл солкуобайтан тахса.
Оскуола тутуллан бүттэҕинэ түмүк сыанатын чуолкайдыыр үлэ ыытыллыахтаах. Эбийиэккэ 2019 сыл ахсынньы 27 күнүгэр «СӨ Судаарыстыбаннай экспертизатын Управлениета» САТ үчүгэй түмүгү биэрбит.
Оскуола тутуутун көрүү түмүгүнэн СӨ Бырабыыталыстыбатын Бэрэссэдээтэлэ  Андрей Тарасенко өрөспүүбүлүкэтээҕи ОДьКХ уонна энергетика Министиэристибэтигэр Олохтоох дьаһалтаны кытта регион биэрэр үбүн сөптөөхтүк туһанар сыаллаах хочуолунайга технологическай холбонуу кыамтатын уонна атын ититиинэн туһанааччылары холбооһуну оросчуоттуулларыгар сорудахтаата.