Киин куорат суһал штаба дезинфекцияны күүһүрдэргэ сорудахтаата

Бэҕэһээ куорат баһылыга Евгений Григорьев куораттааҕы суһал штабы кытта коронавируснай инфекцияны тарҕаппат сыаллаах тэрээһиннэри ыытыы тула мунньахтаатылар. Улахан болҕомто дезинфекцияҕа уурулунна. 
Куорат хаһаайыстыбатын үлэлэтэр сулууспа салайааччыта Айаал Егинов эппитинэн, элбэх кыбартыыралаах дьиэлэр подъездтарыгар, уопсастыбаннай миэстэлэргэ дезинфекция толору кээмэйинэн ыытыллар. 
Бэс ыйын 27 күн киэһэ 18.00 чаастааҕы туругунан, Салайар хампаанньалар былааннаммыт 394 элбэх кыбартыыралаах дьиэттэн 305-гэр  инчэҕэй убуорка оҥорбуттар. 2424 дьиэттэн 549-гар дезинфекциялыыр састаабынан ыраастааһын ыытыллыбыт. 
Уопсастыбаннай миэстэлэр, ол иһигэр 198 оптуобус чарапчыларыгар, 536 оҕо уонна спорт балаһааккаларыгар, 39 сквергэ, култуура уонна сынньалаҥ Пааркатын территориятыгар дезинфекциялыыр үлэ барбыт. 

Айаал Егинов информациятын истэн баран куорат баһылыга бэдэрээччиктэр үлэлэрин хаачыстыбатын хонтуруоллуур наадалааҕын бэлиэтээтэ. Кини Куорат хаһаайыстыбатын үлэлэтэр сулууспа Роспотребнадзоры кытта ити хайысханан үлэни күүһүрдэллэригэр эттэ уонна нэһилиэнньэни подъездтар дезинфекцияларыгар көхтөөхтүк кытталларыгар ыҥырда. Евгений Григорьев улахан болҕомтону оҕо балаһааккаларын дезинфекциялааһыҥҥа уурарга сорудахтаата. 
Мунньахха административнай эбийиэктэри уонна обсерватордарга дезинфекция болдьоҕо уһатылларын, итини сэргэ 304 атыы-эргиэн эбийиэктэрин санитарнай өттүнэн бэрэбиэркэлиир тоҕоостооҕо этилиннэ.