«Киин куорат күөх кубога» күрэх кыайыылаахтарын наҕараадалаатылар

Куорат күнүн көрсө сылын аайы ыытыллар «Киин куорат күөх кубога» күрэх түмүгэ билиннэ. Тэрийээччилэр кэпсээбиттэринэн, бастакы түһүмэххэ 202 кыттааччыттан сайаапка киирбит, иккис түһүмэххэ сүүмэрдээһини 75 кыттааччы ааспыт.

Кыайыылаахтары наҕараадалааһын үөрүүлээх сиэрэ-туома Кыайыы пааркатыгар ыытылынна. Ол курдук, бөдөҥ тэрилтэлэр ортолоругар бастакы миэстэни «Сургутнефтегаз» ПАУо Саха сиринээҕи бэрэстэбиитэлистибэтэ (Киин уокурук) ылла. Иккис миэстэ «Аэропорт Якутск» АХ (Гагаринскай уокурук) буолла. Үһүс бочуоттаах миэстэҕэ СӨ Ил Түмэнин аппараата (Октябрьскай уокурук) тигистэ. 

Орто тэрилтэлэргэ бастыҥынан Өрөспүүбүлүкэтээҕи наркология диспансера (Кангалаас) ааттанна. Иккис миэстэни –  «Панда и журавль» эрэстэрээн (Губинскай уокурук), үһүс миэстэни «Чолбон» спорт оскуолата (Октябрьскай уокурук) ыллылар.

Дьоҕус тэрилтэлэргэ кыайыылааҕынан  «Наша дача» маҕаһыын (Октябрьскай уокурук) ааттанна. Иккис миэстэ – ИП Четвертаков (Гагаринскай уокурук). Үһүс миэстэ – ИП Шадрин М.Д.,  «Кабаре» маҕаһыын (Строительнай уокурук).

Көһө сылдьан үлэлиир атыы-эргиэн эбийиэктэрин ортолоругар бастыҥынан ИП Матренинскай В.А. (Сайсары уокуруга) ааттанна. «СеверМаг» - «Север» ХЭТ (Гагаринскай уокурук) – иккис,  «Город Цветов» флористика салона (Киин уокурук) үһүс миэстэни ыллылар.

«Цветущее долголетие» анал аат кыайыылаахтарынан Хабаров уул., 23/2 (Губинскай уокурук), дьиэ олохтоохторо буоллулар. Иккис миэстэҕэ Елена Билецкая (Кангалаас), үһүс миэстэҕэ Тамара Торокова (Октябрьскай уокурук) тигистилэр. 

Элбэх кыбартыыралаах дьиэлэргэ уонна салайар хампаанньаларга туспа анал аат олохтоммута ордук кэрэхсэбиллээх. Ол курдук, Богдан Чижик уул., 27/1 (Промышленнай уокурук) турар элбэх кыбартыыралаах дьиэ кыайыылаах аатын ылла. Иккис миэстэ – Хабаров уул., 23/2 (Губинскай уокурук), үһүс – Марина Коваленко (Октябрьскай уокурук).

Күрэххэ өрүү күөҕүнэн чэлгийэр тиэргэннээх, тупсаҕай дьиэлээх-уоттаах чааһынай дьиэлээх дьон кытталлара үтүө үгэскэ кубулуйда. Манна кыайыылааҕынан Наталья Воронова (Строительнай уокурук) таҕыста. Иккис миэстэни Айталина Шестаковаҕа  (Хатас), үһүс миэстэни Александра Алексееваҕа (Маҕан) туттардылар.

Күөҕүнэн чэлгийэр саадтаах уһуйаан сыл ахсын элбээн иһэрэ үөрдэр. Манна кыайыылааҕынан  10 №-дээх «Туллукчаан» уһуйаан (Киин уокурук) буолла. Иккис миэстэ – Е.Г. Корнилова аатынан 51 №-дээх «Кэскил» уһуйаан (Сайсары уокуруга), үһүс миэстэ – 33 №-дээх «Теремок» уһуйаан (Гагаринскай уокурук).

Үөрэх кыһаларын ортолоругар бастыҥынан Ф.И. Авдеева аатынан Оҕо айымньытын дыбарыаһа (Киин уокурук) ааттанна. Оттон 35 №-дээх орто оскуола (Октябрьскай уокурук) – иккис, Өрөспүүбүлүкэтээҕи анал (коррекционнай) интэринээт-оскуола (Сайсары уокуруга) үһүс миэстэҕэ тигистилэр.

«Эколидер» анал аат «Урукку» диэн култуура чааһынай тэрилтэтигэр иҥэрилиннэ. «Солнцемания» анал аат кыайыылааҕынан Дьокуускай куорат уопсастыбаннай туоналарын салайар киин буолла.

Олохтоох бэйэни салайыныы уорганнарын ортолоругар кыайыылааҕынан Гагаринскай уокурук таҕыста. Көҕөрдүүгэ бастыҥ көрдөрүүлээх уокурук управатын салайааччыта Е.В. Сидоренко көһө сылдьар «Киин куорат күөх кубогын» тутта.   

Хаартыскалар: Олохтоох дьаһалта пресс-сулууспата, А. Ксенофонтова.