Киин куорат бааһынай хаһаайыстыбалара үүт туттарар былааны толорор сыаллаахтар

Куорат уокуругун территориятыгар 3653 төбө ынах-сүөһү, ол иһигэр 1445 ынах баар. 2021 сылга 2 660,7 т үүтү тутар былаан турар, онтон 1 212,4 т туттарыллыбыт. Ол туһунан Уокуруктааҕы тыа хаһаайыстыбатын Управлениетыгар иһитиннэрдилэр. 
Бу күннэргэ тыа хаһаайыстыбатын Управлениетын специалистара «Якутский гормолзавод» ХЭТ дириэктэрэ Илья Самсоновтыын үүтү туттарааччылары кытта Киллэмҥэ, Мархаҕа, Хатаска сылдьан көрсөн оробуочай мунньахтары ыыттылар. 
Управление начальнига Николай Степанов информациятынан, 2021 сылтан  үүт салаатын судаарыстыбаннай өйөөһүн үрдээбит уонна ити салаа биир дохуоттааҕынан буолбут. Ынах-суөһүгэ субсидия саҥа көрүҥнэрэ киирбиттэр, ол курдук биир төбөҕө 35000 солк. 
«Өр сыллар тухары үүт тыа хаһаайыстыбатын сүрүн туттарар, дохуот киллэрэр көрүҥүнэн буолар. Тэриллиилээх хаһаайыстыбаларга үүккэ көрүллэр субсидия улаатта», – диэн  кэпсиир Управление начальнига.
СӨ Сокуонугар олоҕуран, сүөһү иитиитигэр саҥа судаарыстыбаннай өйөбүл киирбит, ол чэрчитинэн соҕотуопкаланар үүтү тэриллиилээх хаһаайыстыбалартан – тыа хаһаайыстыбатын кооперативтарыттан, бааһынай (фермерскэй) хаһаайыстыбалартан ылыллар. Кэтэх хаһаайыстыбалар бородууксуйаларын дуогабардаспыт сыананан туттарыахтарын сөп.