Киин куорат баһылыга улуустар түмсүүлэрин кытта көрүстэ

Тохсунньу 25 күнүгэр баһылык Евгений Григорьев куорат социальнай-экономическай сайдыытын сыллааҕы отчуотун уонна быйылгы былааннар туһунан улуустар түмсүүлэрин иннигэр кэпсээтэ.

Улуустар түмсүүлэрин сэбиэтин бэрэссэдээтэлэ Иван Неустроев ааспыт сылга Саха АССР тэриллибитэ 100 уонна Дьокуускай куорат төрүттэммитэ 390 үбүлүөйдээх сылларынан Сайсары күөл өрөспүүбүлүкэ култуурунай нэһилиэстибэтэ буоларын кэрэһилиир стела туруоруллубутун, араас таһымнаах субуотунньуктар, Кэбээйи, Дьааҥы оройуоннар халаан уутуттан эмсэҕэлээбиттэригэр, анал байыаннай эпэрээссийэ кыттыылаахтарыгар уонна кинилэр дьиэ кэргэттэригэр көмө аахсыйалар ыытыллыбыттарын кэпсээтэ. 

Отчуот кыттыылаахтара куорат баһылыгыттан «Сатал» СОНТ, куорат кытыытыгар сылаас тохтобуллары элбэтии, оптуобус сырыытын тэрийии, оскуола тутуутун боппуруостарын туруордулар. Улуустар бэрэстэбиитэллэрин итини сэргэ куорат былыргы архитектуратын, чуолаан Залог оройуонун үйэтитии о.д.а. кыһалҕалара долгутара билиннэ. 
Улуустар түмсүүлэрин сэбиэтэ 2021 сыл кулун тутар ыйыгар тэриллибитэ. Сэбиэт 34 муниципальнай оройуон бэрэстэбиитэлин түмэр. Ордук көхтөөхтүк Горнай (Н.П. Федорова), Алдан (А.А. Кожевников), Өлүөхүмэ (А.В. Куприянов), Анаабыр (Е.А. Туприна), Нам (Г.Г. Местников), Уус Майа (А.Н. Исакова), Ньурба (Е.Г. Яковлева) түмсүүлэрэ үлэлииллэр.