Киин куорат баһылыга командировкаҕа барда

Куорат баһылыга Евгений Григорьев бүгүн Санкт-Петербурга оробуочай командировкаҕа барда. Ону сэргэ кини Казань куоракка сылдьыаҕа.
Баһылык бүгүн Санкт-Петербурга аан дойдутааҕы экономическай форумҥа ВЭБ.РФ сайдыытын судаарыстыбаннай корпорациятын ыҥырыытынан дискуссиялыыр балаһааккаларыгар кыттыаҕа. 
Тэрээһин тиэмэлэрэ: «Кэлэр кэм куората» (куораттар сайдыыларыгар саҥа саҕалааһыннар), «Куораттар дьон иһин күрэс былдьаһаллар» (сайдыы бырайыактарын презентацията) уо.д.а.
Куораттар тыын боппуруостарын тула кэпсэтиигэ былаас федеральнай, региональнай уонна муниципальнай уорганнарын салайааччылара, экспертэр, сайдыы федеральнай институттарын салайааччылара кытталлар.  Евгений Григорьев өрөспүүбүлүкэ киин куоратыгар оптуобустар пааркаларын саҥардыыга «Уһук Илин куоратын тырааныспарын саҥардыы» федеральнай бырагыраамаҕа киирсэр сыаллаах былаан туһунан презентация оҥоруоҕа. 

Бэс ыйын 3 күнүгэр киин куорат баһылыга Москва куоракка «Росавтодор» Федеральнай суол агентствотыгар «Куттала суох, хаачыстыбалаах суоллар» национальнай бырайыак чэрчитинэн 2022 сылга Дьокуускай куорат суолларын өрөмүөнүн былаанын көмүскээһиҥҥэ үлэлиэҕэ. 
Салгыы Евгений Григорьев Казань куоракка Татарстаҥҥа ыытыллар Саха сирин күннэригэр кыттыаҕа. 
Командировка кэмигэр куорат баһылыгын эбээһинэһин Алексей Корнилов толорор.