Киин куорат «Азия оҕолорун» көрсөргө эппиэтинэстээхтик бэлэмнэнэр

VIII-с «Азия оҕолоро» Норуоттар икки ардыларынааҕы спортивнай оонньуулар аны сайын бэс ыйын 25 күнүттэн от ыйын 7 күнүгэр диэри спорт 24 көрүҥэр Дьокуускайга ыытыллаары тураллар. Бүгүн, тохсунньу 18 күнүгэр, Олохтоох дьаһалтаҕа баһылык эбээһинэһин толорооччу Георгий Гаврильев Оонньууларга бэлэмнэниини тэрийэр кэмитиэт уочараттаах мунньаҕын ыытта.  

Оонньуулар таһымнара уонна хаачыстыбалара аһыыр, хонор, сынньанар дьиэлэртэн, күүлэйдиир, айанныыр уулуссалартан быһаччы тутулуктаах.

Үөрэх управлениетын начаалынньыга Мария Петрова иһитиннэрбитинэн, спортсменнар, волонтердар, судьуйалар аһыылларыгар Үөрэх управлениета 8 оскуола остолобуойун бэлэмниир.

Урбааҥҥа, потребительскай ырыынакка уонна туризмҥа департамент начаалынньыгын эбээһинэһин толорооччу Кирилл Лазарев Оонньууларга туһаныллар аһылык тэрилтэлэригэр кытаанах ирдэбиллэр туралларын, асчыттар уонна аһылыгынан хааччыйааччылар Роспотребнадзорга аккредитация ааһалларын эттэ.

Баһылыгы куораты сайыннарыы, тырааныспар боппуруостарыгар солбуйааччы Антон Алексеенко спорт эбийиэктэрин өрөмүөнүн хаамыытын туһунан иһитиннэриини оҥордо. Саҥа тутуллан үлэҕэ киирэн эрэр эбийиэктэртэн Хатаска элбэх функциялаах комплексы тутуу түмүктэммитин, Сайсары уокуругар тутуллар эбийиэк 60 % бэлэмин, Оонньуулары көрсө үлэҕэ киириэхтээҕин иһитиннэрдэ.

Уопсастыбаннай туоналары тупсарыы чааһыгар Роман Дмитриев аатынан кытылга уонна Сайсары күөлгэ элбэх үлэ күүтэрин бэлиэтээтэ.

Куорат баһылыгын хаһаайыстыба боппуруостарыгар солбуйааччы Егор Кардашевскай куораты тупсарыы туһунан иһитиннэриини оҥордо. Чуолаан дьиэлэр фасадтарын саҥардан оҥоруу, уулусса-суол ситимин, уопсастыбаннай туоналары, пааматынньыктары көрүү-истии, көҕөрдүү, бөҕү хомуйуу былаанын иһитиннэрдэ. Баһылыгы солбуйааччы бу үлэлэргэ уонна VIII-с «Азия оҕолоро» оонньуулары ыытарга устудьуоннар тутар этэрээттэрин модун күүһүн туһанар наадатын туһунан эттэ, диэн иһитиннэрэр Олохтоох дьаһалта пресс-сулууспата.