Киин куораппыт ытык-мааны олохтоохторо, күндү доҕоттор!

Бүгүн биһиги Саха Өрөспүүбүлүкэтин Судаарыстыбаннаһын күнүн, билиҥҥи Саха сирэ сайдар саҕахтарыгар акылаат ууруллубут күнүн бэлиэтиибит. Модун дойдубут каартатыгар өрөспүүбүлүкэбит кыраныыссалара хайдах суруллубуттара да, хас биирдии олохтоох дьылҕата Арассыыйаны кытта оннук ситимнэммитэ. 

Саха сирэ – Уһук Илиҥҥэ биир инники күөҥҥэ сылдьар регион. Өрөспүүбүлүкэ үс гыммыттан биирэ Дьокуускайга олорор, онон биһиги куораппыт күн аайы дойду экономикатыгар, наукатыгар, култууратыгар, социальнай эйгэтигэр бэйэтин дьоһун кылаатын киллэрэр. Ол курдук, биһиги киин куораппыт өрөспүүбүлүкэни инновационнай быһаарыныыларга сирдиир, саҥа кыайыыларга кынаттыыр.

Маны барытын Дьокуускай дьоһун-мааны олохтоохторо куораппыт, өрөспүүбүлүкэбит, дойдубут сайдарын, чэчириирин туһугар үтүө суобастаах үлэлэринэн ситиһэллэр.

Бүгүҥҥү бырааһынньыкка биһиги өрөспүүбүлүкэбит төрүттээччилэрин, Саха саарыннарын саныыбыт. Ону таһынан 1990 сыллаахха судаарыстыбаннай Суверенитеты төрүттээбит Саха сирин түс-бас дьонугар дириҥ ытыктабылбытын биллэрэбит. Кинилэр эр санаалара, бэйэлэригэр, сыалларыгар-соруктарыгар энчирээбэт эрэллэрэ биһиэхэ өрүү үтүө холобур буолар.

Бырааһынньыгынан, доҕоттор! Сахабыт сиригэр или-эйэни, бары үтүөнү, сайдыыны! Саха Өрөспүүбүлүкэтин Судаарыстыбаннаһын күнүнэн!

Куорат баһылыга Сардана Авксентьева