Киин куоракка санитарнай ирдэбиллэри тутуһааныны хонтуруоллаһын салҕанар

Дьокуускай куораттааҕы суһал штаб бөлөхтөрө коронавируснай инфекцияны тарҕаппат сыалтан общепит, култуурунай-сынньанар сирдэринэн уонна уопсастыбаннай тырааныспарга рейдэлэри тиһигин быспакка ыыталлар. 
Административнай хамыыһыйа түһэриитинэн мировой суутунан 192 дьыала көрүлүннэ, онтон 177 тэрилтэҕэ сэрэтии бэрилиннэ, 14 ыстарааптанна. 
Атырдьах ыйын 5 күнүгэр бөлөх уонна  салайыы территориальнай уорганнара 31 эбийиэги бэрэбиэркэлээтилэр, ол иһигэр 2 маршрутнай оптуобуһу. 4 быраабыланы кэһии билиннэ, ол иһигэр 3 Губинскай уокурукка. Уокурукка барыта 6 эбийиэк бэрэбиэркэлэннэ. Промышленнай уокурукка 8 эбийиэк, ол иһигэр 2 оптуобус бэрэбиэркэни ааста, санитарнай-эпидемиологическай миэрэлэри кэһии булуллубата. Гагаринскай уокурукка 10 эбийиэк бэрэбиэркэлэнэн биир миэрэлэри кэһии билиннэ. Автодорожнай уокурукка 7 эбийиэк бэрэбиэркэлэммит. Ити күн барыта 4 боротокуол толоруллубут. 
Куораттааҕы суһал штаб коронавирус дьаҥын тохтотор сыалтан мааска кэтэр эрэсиими тутуһаргытыгар ыҥырар.