04.05.2022 | 16:00

Киин куоракка Сүрэх-тымыр киинэ арылынна

Киин куоракка Сүрэх-тымыр киинэ арылынна
Ааптар: Киин Куорат
Бөлөххө киир

Саха Өрөспүүбүлүкэтэ төрүттэммитэ 100 сылын бэлиэтиир үөрүүлээх тэрээһиннэртэн биирдэстэринэн киин куоракка Сүрэх-тымыр киинин арыллыыта буолла. Үөрүүлээх тэрээһиҥҥэ РФ доруобуйа харыстабылыгар миниистирэ Михаил Мурашко уонна СӨ Ил Дархана Айсен Николаев кытыннылар. Бу туһунан Саха Өрөспүүбүлүкэтин Баһылыгын уонна Бырабыыталыстыбатын пресс-сулууспата иһитиннэрдэ.
Киин тутуута Уһук Илини уонна Арктиканы сайыннарыы министиэристибэтин көҕүлээһининэн, «Биир кэлим субсидия» федеральнай бырагыраамаҕа киирэн икки сыл иһигэр тутулунна. Үбүлээһин уопсай суумата – 5,1 млрд солкуобай, улахан өттө Уһук Илини уонна Арктиканы сайыннарыы министиэристибэтин линиятынан ыытылынна. Саҥа Сүрэх-тымыр киинэ Уһук Илиҥҥэ эрэ буолбакка, Арассыыйа үрдүнэн саамай аныгы киининэн буолар. 


«Бүгүн биһиги отой ураты эбийиэги арыйабыт — медицина бриллианын, бу бүгүҥҥү күҥҥэ региоҥҥа олус наадалаах — Сүрэх-тымыр киинэ. 15 тыһыынча кв миэтэрэ үрдүк технологиялаах, уһулуччу хааччыллыбыт эбийиэк. Манна 560-тан тахса персонал уонна 260 быраас үлэлиирэ былааннанар», — диэтэ Михаил Мурашко. 
Кини манна кардиология уонна терапия сулууспаларын салайан, сэрэтэр үлэни, диагностиканы уонна эмтээһини дьүөрэлээн ыытарга туһуламмыт сүрүн киин буолуоҕа диэн бэлиэтээтэ. 
Өрөспүүбүлүкэ Ил Дархана өссө 2019 сыллаахха бу боппуруоска Уһук Илиҥҥи уокурукка  РФ бэрэсидьиэнин боломуочуйалаах  бэрэстэбиитэлэ Юрий Трутневы кытта кэпсэппитин уонна Уһук Илиҥҥи бырагырааманан федеральнай бүддьүөттэн үп бэриллэрин ситиспит Юрий Петрович өйөбүлүнэн бу эбийиэк тутуутун быһаардыбыт диэн тоһоҕолоон бэлиэтээтэ. 
«Ыраах сиргэ тайаан сытар нэһилиэнньэлээх пууннардаах, килиимэти, логистиканы кытта сибээстээх уустуктардаах Саха сиригэр Сүрэх-тымыр киинэ ураты суолталаах. Бүгүҥҥү күҥҥэ кини өрөспүүбүлүкэбитин эрэ буолбакка, ыаллыы регионнарбытын – Магаданы уонна Чукотканы эмиэ хабыан сөп. Бу бырайыагы олоххо киллэрэргэ, тутууну үбүлүүргэ көмөлөспүт дьоҥҥо махтанабын. Арассыыйа Бырабыыталыстыбатыгар, РФ Доруобуйаҕа харыстабылын министиэристибэтигэр, Уһук Илини сайыннарыы министиэристибэтигэр өрөспүүбүлүкэ бырайыагын өйөөбүттэригэр махтанабын. Биһиэхэ РФ Доруобуйаҕа харыстабылын министиэристибэтэ, РФ доруобуйаҕа харыстабылын миниистирэ Михаил Мурашко улаханнык көмөлөстүлэр. 
Аны билигин чугастааҕы сорукпут – киин куоракка Онкология киинин үлэҕэ киллэрии. Кистэл буолбатах, аан дойду үрдүнэн, ол иһигэр биһиэхэ, искэн ыарыылаахтар ахсааннара элбээн иһэр. Онкология киинэ эмиэ маннык үрдүк таһымнаах буолуоҕа диэн эрэнэбит. Өссө биир инники сорукпут – инфекционнай балыыһаны тутуу. Хомойуох иһин, өрөспүүбүлүкэҕэ инфекционнай анал балыыһабыт суох. Маннык балыыһа булгуччу баар буолуохтааҕын ковид балаһыанньата көрдөрдө», — диэтэ Айсен Николаев. 
Ыам ыйын 1 күнүгэр регион баһылыга Айсен Николаев уонна РФ доруобуйа харыстабылыгар миниистирэ Михаил Мурашко тутулла турар Өрөспүүбүлүкэтээҕи онкология киинигэр сырыттылар. Тутуу график быһыытынан бара турар, бүгүҥҥү күннээҕи туругунан эбийиэк 67,3 % бэлэм.
180 куойкалаах стационардаах Онкология киинин уопсай иэнэ 25 тыһыынча кв. миэтэрэттэн тахса. Эбийиэк тутуута «Доруобуйа харыстабыла» национальнай бырайыак чэрчитинэн, итиэннэ «Саха Өрөспүүбүлүкэтин доруобуйа харыстабылын 2020-2024 сылларга сайдыыта» өрөспүүбүлүкэтээҕи судаарыстыбаннай бырагырааманан үбүлүнэр. Онкология киинэ 2023 сыл күһүнүгэр үлэҕэ киирэрэ былааннанар.

Сонуннар

Ордук ааҕаллар

Утуйуу хаачыстыбата улахан суолталаах
Сонуннар | 15.03.2024 | 14:00
Утуйуу хаачыстыбата улахан суолталаах
Кулун тутар 15 күнүгэр Аан дойдутааҕы Утуйуу күнэ бэлиэтэнэр. ВОЗ статистикатынан, нэһилиэнньэ 10-30% кыайан утуйбакка (бессонница) эрэйдэнэр, сорох дойдуларга ити көрдөрүү 50−60%-ҥа тиийэр.
Сыана үрдээһинэ
Сонуннар | 22.03.2024 | 18:00
Сыана үрдээһинэ
(2024 сыл олунньу ыйдааҕы көрдөрүүтүнэн)
Социальнай биэнсийэ эбиллэр
Сонуннар | 16.03.2024 | 18:00
Социальнай биэнсийэ эбиллэр
Муус устар 1 күнүттэн социальнай биэнсийэ 7,5 бырыһыан үрдүүр. Бу туhунан 262 N-дээх уурааҕы кулун тутар 5 күнүгэр Арассыыыйа Бырабыыталыстыбата бигэргэттэ. Индексация кээмэйэ ааспыт сылга биэнсийэлээхтэргэ олох таһымын алын кээмэйин улаатыытынан ааҕыллар. Бу төлөбүргэ анаан социальнай пуонда бүддьүөтүгэр 37,5 млрд солк. көрүлүннэ. Статитстика көрдөрөрүнэн, Арассыыйаҕа 4 мөлүйүөнтэн тахса киһи социальнай...
Сергей:  «Уолаттар санаалара-оноолоро харахтарыгар көстөр»
Дьон | 21.03.2024 | 18:00
Сергей: «Уолаттар санаалара-оноолоро харахтарыгар көстөр»
Оҕо сылдьан разведчиктаах киинэлэри умсугуйан көрөрбүт, кинилэр курдук буолуохпутун баҕаран, сэриилээх оонньуурбут, саһа, сыбдыйа, сыылла сылдьан өстөөхтөрбүтүн самнарарбыт.  Разведчик диэн тылы иһиттэхпинэ, тута харахпар Штирлиц уобараһа көстөр. Кини өстөөхтөр уйаларыгар тиийэн, былааннарын, дьайыыларын биһиги дьоммутугар тиэрдэн, кыайыыны ситиһэргэ улахан кылаатын киллэрсэр.   Ол аата дьиҥнээх разведчик хайдах буолуохтааҕый? Кини боростуой саллаат...