Киин куоракка Кыайыы Пааркатын тупсараллар

Дьокуускайга Кыайыы Пааркатын тупсаран оҥоруу 2-с уочарата саҕаланна. Үлэни 37,8 мөл. солк. суумалаах муниципальнай хантыраагынан бэдэрээччик «Граджилстрой» ХЭТ оҥорор. Бэдэрээччик үлэтин атырдьах ыйын 10 күнүттэн саҕалаабыт. Быйыл 46 697 кв. м. иэннээх территория тупсаран оҥоһуллуохтаах. 
Балаҕан ыйын 30 күнүгэр диэри эбийиэккэ туруору планировка сороҕо, суолу аспааллааһын, тротуар, бэлиссипиэттиир суоллар, ууну сүүрдэр лотоктар уо.д.а. оҥоһуллуохтара. 
Сакаасчыт «Главстрой» МКТ информациятынан, Кыайыы Пааркатын тупсаран оҥоруу чэрчитинэн быйыл «Кыайыылаах Саллаат дьиэ кэргэнинээн» скульптурнай композиция туруоруллуохтаах. 17 мөл. солк. хантыраагынан «Саха Өрөспүүбүлүкэтин Худуоһунньуктарын Айар Сойууһа» скульптуранан хааччыйыаҕа. Тутар-таҥар үлэ болдьоҕо балаҕан ыйын 10 күнүгэр диэри. 
Санатан эттэххэ, Кыайыы Паарката Өктөөп 50 сыла уулусса автострадатыгар «Үс Сэргэ» стела аттыгар баар. Бырайыагы «Старт» Бырайыактыыр бюро ХЭТ оҥорбут. Бырайыак быһыытынан паарка территориятыгар болуоссат, мемориальнай маршрут, фонтан, сүүрэргэ уонна бэлиссипиэттииргэ анаммыт суоллар, оҕолорго уонна спордунан дьарыктанарга анаммыт зоналар, остуол оонньуулара, гамактар, фудкорт уонна амфитеатр баар буолуохтара. 
Кыайыы Паарката — сынньанарга, саатыырга анаммыт аныгы паарка, ити таһынан, сүрүн соруга – Аҕа дойду Улуу сэриитин туһунан история өйдөбүнньүгэ буолар. 
Паарканы тупсаран оҥоруу Саха АССР тэриллибитэ 100 уонна Дьокуускай куорат 390 сылларыгар – 2022 сылга түмүктэниэҕэ.